BOGOTA, Colombia (AFP).- Diesun menor a muri siman pasá den peleanan entre disidentenan rival dje èks gueria di FARC den un region amazóniko di Colombia. E konfrontashonnan entre e rebeldenan bou di direkshon di Ivan Mordisco, e kriminal mas buská dje pais, i esnan ku ta sigui “alias Calarcá” a laga 48 morto den e siudat di Guaviare, kaminda tin un guera pa negoshi lukrativo di narkotráfiko.
Despues di análisis di e kurpanan, Medicina Legal a konkluí ku diesun di e rebeldenan ku a pèrdè nan bida tabata menornan di edat. Te ku ayera tabatin sinku kadaver ku no a keda identifiká. “Ta un situashon teribel ku entre kolombianonan ta matando e personanan ku ta e futuro di Colombia”, segun Ariel Cortés, direktor di Medisina Legal.
Na Colombia a bira normal ku gruponan armá poderoso ta reklutá e menornan, segun Defensor di Pueblo. E siguidónan di Mordisco, kende e presidente Gustavo Pedtro ta kompará ku Pablo Escobar, ta esnan ku ta reklutá mas hóben. Hopi biaha ta atraé nan via di retnan sosial na áreanan dje pais ku tin poko presensia di polis, segun organisashonnan humanitario.
“Nos ta sakrifikando muchanan na kende nos ta nenga e derechi pa un bon futuro”, segun Iris Marín, defensor di pueblo. E gobièrnu di Petro a purba, sin éksito, pa negoshá pas ku Mordisco i Calarcá. Tur dos grupo ta ataká e forsa públiko i sivilnan ku atentado, asesinato i sekuestronan, meimei di un ola di violensia den pleno kampaña presidensial.
Den novèmber di 2025 un atake di ehérsito kontra guerieronan a laga shete menor morto. E ultra derechista, Abelardo de la Espriella, faborito segun enkuestanan pa e balotahe di 21 di yüni, ta primintí man di heru kontra di krímen i ta insistí ku “estado no por permití e uso di muchanan komo eskudo di gruponan armá.
