ORANJESTAD.-EXTRA a tuma nota ku tantu ayera komo awe djamars polis di Aruba a hasi detenshon di hóbennan relashoná ku poseshon di arma di kandela. Den un informe ofisial polis di Aruba ta indiká ku awe a hasi detenshon di dos hóben. E promé detenshon tabata den Pos Chiquito, esaki ta un investigashon relashoná ku un arma di kandela ku a haña na Surfside Marina algun siman pasa. Na momentu di e detenshon e sospechoso tabata huntu ku un otro persona den un vehíkulo kende a purba na kore bai, pero a logra detené mesora.

Durante di e detenshon a bin topa e sospechoso aki ku un arma di kandela. Ta trata di e sospechosonan D.C. i J.S ku tabata den e outo. Polis di Aruba ta indiká ku esaki ta e di dos arma di kandela den poseshon di e mesun sospechoso.

Ta bon pa splika ku djaluna tambe polisnan a hasi detenshon. Ta asina ku un patruya a para un outo pa kontrol na altura di Ierlandstraat i na dado momentu un hóben maskulino a Sali for di e outo i baha na katuna. Despues a haña un arma di kandela skondí den un kura di un kas pega eibanda. Atrako tim a hasi nan investigashon i a detené e mucha hòmber J.R di 16 aña di edat. Polis ta bisa ku e detenshon aki ta yega na un total di 3 persona detené relashoná ku poseshon di arma di kandela.

LAGA UN KOMENTARIO

Please enter your comment!
Please enter your name here