WILLEMSTAD.- Si e portanan di hospital nobo, Curaçao Medical Center habri dia 15 di novèmber próksimo niun operashon lo no por tuma lugá. Tin asina tantu kos robes pa drechi den e hospital ku mester hasi e pregunta si e hospital lo habri su portanan mes. Esei ta un relato ku a keda publiká den e korant ulandes Trouw komo kontribushon di nan koresponsal na Kòrsou Dick Dryer. Kòrsou ta pendiente pa apertura di su hospital nobo. E komunidat aki mester a warda ,as ku 100 aña pa haña un hospital nobo, ku tur e konsekuensianan ku esei a trese kuné den transkurso di añanan. Sinembargo dokumentunan den poder di EXTRA ta indiká ku tin hopi aspektonan importante ku lo no ta kompletamente kla pa e fecha ku ta menshoná, komo fecha di apertura di e hospital Curaçao Medical Center.
Entre e diferente defisiensianan ta menshoná e.o ku salanan di operashon lo no por funshoná debí na diferente fayo. Wayanan di koriente lo no ta koriendo di forma korekto, segun normanan di konstrukshon pa un hospital, portanan ku mester habrí elektrónikamente ta keda pegá òf no ta habri ètòl, kabelnan ku mester duna alerta di kandela ta bentá mei mei di otro kabelnan ku tur e konsekuensia ku esei ta trese kuné.
E publikashon a sòru pa bastante komentario di esnan den e sektor. Direktor di St. Elisabeth den deklarashon na prensa ta konfirmá ku el a haña petishon pa tene sierto departamentonan habri despues di 15 di novèmber. Entre e departamentonan ku Sehos mester tene habrí tin salanan di operashon i departamento di sterilisashon. Dokumentunan ta mustra tambe ku AT Osborne komo gerente di proyekto ku tei, na nòmber di HNO pa wak si Ballast a kumpli ku tur e puntonan di HNO ta indiká ku tin por lo ménos nuebe punto ku e hospital no ta kumpli kuné anto ku segun Osborne esei lo ta motibu di rísiko haltu. Manera indiká Osborne ta hasi e trabounan di kontròl na number di gobièrnu di Kòrsou.
Tin hopi atenshon na wayanan di koriente ku lo ta bentá pa nan kuenta den plafòn na lugá ku e kabelnan aki ta kore sunú i esei ta kompletamente robes.
Ta indiká ku wayanan di kandela no ta bon kubrí i meskos ta e kaso ku e sistema di maneho di e edifisio ku lo no ta funshonando. E sistema di airu den e hospital nobo no ta sirbi, salanan di operashon ta kore e rísiko ku e sistema di iluminashon i e sistema di airu no ta kumpli ku normanan. E salanan di operashon ta kore rísiko ku airu sushi lo por meskla i ku airu limpi ku tur konsekuensia ku esei por trese kuné. E sentro di katerisashon, komo e sentro di sterilisashon no tin e seyo di balides ainda i a base di esei no tin klaridat kon ta pará ku e preshon di airu, temperatura, humedat relativo i kontaminashon mikrobiológiko di aire den e departamentonan menshoná.
Tin un trayekto yamá ‘milestones’ ku ta tèst e diferente ekipo i instalashonnan. Ta un lista largu tin di tèstnan insidental.Tur e tèstnan ta despues ku a anunsiá esei na e gruponan konserní. Osborne no por a indiká kua ta e trabounan ku mester tuma lugá ainda promé ku e apertura. Tampoko no tin klaridat ki dia lo atendé ku e problemanan chikitu den e prizòn.
A duna enkargo na Ballast Nedam pa konstrukshon di e hospital na 2013. Mester a traha un hospital di 300 kamber pa un suma inisial di alrededor di 200 mion euro. E tardansa den konstrukshon a kousa un gastu adishonal di 100 mion euro èkstra. Pa kolmo e finansiamentu ainda no ta kla. Mester a entregá e hospital den un prinsipio na 2015 despues a skùif e fecha pa 2017, 2018 i awor na 2019.
