WILLEMSTAD.- E aña aki durante e selebrashon di promé di mei sentralnan sindikal ta pone hopi énfasis riba dignidat i rèspèt e trahadó. Asina ta akapará tur e diferente nòmbernan ku na Kòrsou a duna e dia aki, manera Dia di Obrero, Dia di labor i Dia di Trabou. E selebrashon ta relashoná ku un lucha ku a kuminsá for di 1886 na Chicago pa e derecho di 8 ora di trabou pa dia.
Na 1886 a surgi un tragedia lamentabel durante ku tabata hiba luchanan pa 8 ora di trabou pa asina e trahadó tin alabes 8 ora pa e deskansá i 8 ora pa rekreá. Promé ku esaki tabata maltratá trahadónan den sentido ku nan tabata traha hopi mas tantu ora pa dia. Tabata usa e nòmber Dia di Obrero ku tabata krea mas un impreshon ku e konmemorashon ta relashoná ku hendenan ku ta hasi trabou manual, pero e enfoke mester ta riba e trahadó lòs for di e tipo trabou ku ta hasi.
Asina presidente di SSK, Wendell Muelen, ta indiká. “Importante ta ku ta reflekshoná riba e dia aki.” E aña aki atrobe, manera ta e kaso último añanan, tur 3 sentral sindikal, esta SSK CGTC i SSS ta organisá konhuntamente e aktonan ofisial i selebrashonnan.
Durante di e preparashonnan tabatin hopi diskushon interno, meskos ku tabata e kaso aña pasá, pa wak di ki forma por trese kambio i inovashon den e aktonan seremonial i di selebrashon tradishonal. “Pero tempu ta hunga un ròl i si ke hasi kambio mester di tempu. A disidí ku ta sigui hiba diskushonnan interno pa wak kon ta trese kambio den futuro.”
Hendenan a kustumbrá ku tradishonalmente lo tin un Santu Sakrifisio di Misa riba e dia, i djabièrnè awor esaki ta e kaso atrobe na Misa di Sta. Famia ku ta kuminsá 10or. Pastor Curtis Meris ta esun ku lo hiba e misa. Tambe tin diskurso despues di e misa.
E aña aki ta presidente di SSS, Frensley Sille, ta esun ku lo hiba palabra. Minister di Labor, Charetti America-Francisca, lo ta esun ku lo hiba palabra na nòmber di gobièrnu. Pa e sentralnan sindikal e énfasis di e konmemorashon e aña aki ta dignidat.
“Tantu dignidat di e trahadó komo dignidat di Kòrsou. E palabra dignidat ta para pa hasi kosnan hustu i korekto, i no menospresiá trahadónan. Esaki ta hopi importante pa e kampo laboral, esta, pa trata trahadónan ku dignidat.”
Dignidat di hende, Muelen ta sigui bisa, ta konta pa henter komunidat. Pa trata otro ku rèspèt i dignidat. “Lamentablemente ta mira ku na hopi okashon no ta respetá leinan laboral. Tin hopi kaso di humiashon di trahadó i falta di rèspèt. Den komunidat tambe ta mira falta di rèspèt manera den polítika kaminda polítikonan ta falta otro rèspèt.”
