PG tambe a hasi petishon a base di informenan falsu

Abogado Sulvaran ku asombro ta puntra

WILLEMSTAD. – Relashoná ku investigashon  kontra di hefe di Servisio di Atmishon, mr. Esther Cheri, Abogado mr. Eldon ‘Peppie’ Sulvaran ku asombro ta puntra, dikon Prokurador General (PG) no a kuminsá un investigashon penal kontra di su mes persona.

Ministerio Públiko ta promové balornan di famia, ora ta trata solamente promové balornan di miembronan familiar di nan mes e ora ei ta midi ku dos midí.

Sulvaran den su defensa a para ketu un ratu na e echo kon e investigashon kontra di Hefe di Servisio di Atmishon i algun kolega ku por sierto tur ta hendenan lokal, a kuminsá.

Tabata 26 di ougùstùs di aña 2016 ku Prokurador General mr. Guus Schram a duna òrdu na “Landsrecherche” di Kòrsou pa kuminsá ku e investigashon penal kontra empleadonan di Servisio di Atmishon. Sulvaran su pregunta direkto ta, dikon Prokurador General Schram no a kuminsá mesora ku un investigashon penal kontra di su mes persona i su kasá i tambe esnan ku tabata responsabel pa ku entrega di su petishon.

Sulvaran a splika korte ku e petishon di Prokurador Schram i su kasá tur dos a keda pidí riba informenan falsu i no korekto, pa motibu ku tur dos a hasi petishon a base di e regla di penshonado i rentista, miéntras niun di dos no tabata penshonado ni tampoko rentista.

Otro nota kla ku ta mustra riba iregularidat, ta ku nan petishon tabata fechá 30 di yanüari 2014 i nombramentu di Guus Schram komo Prokurador General tabata promé di febrüari 2014, esta un dia despues i pa kolmo basá riba informashonnan falsu manera ya menshoná.

Pero esakinan no tabata e úniko informenan falsu i inkorekto ku e pareha Schraam a entregá, pa motibu ku a hasi manera ta prolongashon di nan estadia ta tumando lugá, miéntras ku esei no tabata e kaso, pa motibu ku Schram tabata trahando te algun dia promé ku el a bin Kòrsou na Parkèt Rotterdam, pues kon bin e ta hasi petishon a base di prolongashon di estadia, miéntras ku esei no ta e kaso.

Ora ku a kuminsá  ku e investigashon kontra di Hefe di Atmishon mr. Esther Cheri, dikon no a kuminsá mesora investigashon kontra di Schram i su señora.

Ta insólito ku e mesun Schram ku ta hasi petishon a base di informenan falsu, e ta pidi pa investigá Cheri.

Sulvaran ta enfatisá ku e loke ku e ta trese dilanti no tin duda aden i ta trata di informenan verídiko.

E punto mas rekòr ta na opinion di Sulvaran ta ku señora di Schram a bai traha den un posishon dirèkt bou di su kasá komo “Liaison Officer di Parkèt Karibense komo hefe, miéntras tabatin hopi hende lokal ku sufisiente konosementu ku por a okupá e puesto komo tal.

Sulvaran a mustra tambe riba e fiskal ku tin persiguishon kontra di Cheri na su enkargo, esta ku su e fiskal tambe a kuminsá traha sin ku e tabatin e pèrmitnan nesesario pa e traha aki na Kòrsou. Pero ta straño na opinion di Sulvaran ku durante e investigashon kontra di Cheri, niun polis no a topa ku e iregularidat aki. Fiskal  van Vliet su informe no ta aparesé riba e lista di iregularidatnan ku na  opinion di Ministerio Públiko, Cheri a faya kuné.

Dia 22 di òktober benidero e kaso ta kontinuá.

SHARE

LEAVE A REPLY