KRALENDIJK.- Diputado Elvis Tjin Asjoe definitivamente no ta strobando ningun investigashon. Esaki Reginald (Yonchi) Dortalina, direktor di BonLab ta trese dilanti. E no ta trahando, debí na un investigashon ku ta tumando lugá na BonLab. “M’a tuma nota di un komunikado ku algun supuesto trahadornan di Bonlab a publiká, akusando ami i diputado Tjin Asjoe di yen di kos mahos. Manera ya ta bisto, polítika ta hungando su wega. Ta trata na provoka mi pa bisa algu, miéntras ku ta bon konosí ku mi tin prohibishon pa papia riba di Bonlab. Lo yega e dia ku lo mi aklará tur kos.

Por lo pronto mi ta apstené mi mes di papia tokante di Bonlab i ta warda ku tur pasenshi di mundu e resultado di e investigashon ku ta tumando luga”, Yonchi Dortalina ta remarká. “Loke sí mi por papia di dje ta di e polítika sushi ku ta tumando lugá. Ta usando hende pa hunga polítika sushi kontra diputado Elvis

Tjin Asjoe. Ta bèrdat ku nos a lanta huntu den Antriol i ku nos ta amigu. Mi no por nenga esei. Ta bèrdat tambe ku mi tin kasi 4 luna sin papia ku Tjin Asjoe. Asta mi por bisa ku mi ta hopi rabiá kuné mes p’e motibu ku e ni sikiera a reakshoná riba un inhustisia ku a keda kometé kontra mi. E no ta kontestá mi yamadanan ni mi appnan”, Dortalina ta remarká.

Segun Dortalina, Tjin Asjoe a bisa semper ku e ta distansiá su mes for di tur loke ku ta pinta di ta favoritismo pa su persona, pa nan no tild’é di kier yud’é òf defend’é. Nèt loke e no tabata ke ta pasa kuné aworaki. Esaki ta inhustu.

Dortalina: “Mi kier aklará esaki pa e polítikonan ku ta tira piedra skonde man i ku ta hasi uso di hende pa logra defamá e diputado. Pues no ta bèrdat ku Elvis Tjin Asjoe ta strobando ningun investigashon. No ta bèrdat ku e ta defendiendo. E ni sikiera a papia ku mi den e ultimo 4 luna. Den tur loke nos hasi, nos mester korda di ta semper sinsero i hustu. No kalumniá hende inhustamente. No lanta falsu testimonio kontra bo próhimo. No usa mi nòmber pa daña nòmber di otro. Si bo ta inosente bo no tin mester di ningun hende pa defendé bo. Anto si mester defendé ami politikamente, lo mi por hasi esaki mihó ku Elvis.”

LAGA UN KOMENTARIO

Please enter your comment!
Please enter your name here