BOGOTA, COLOMBIA, AP.- Un grupo di diputado di e komishon di asuntunan eksterior di parlamento europeo a respaldá e proseso di pas di gobièrnu kolombiano ku gueria di FARC.
E grupo europeo di shete miembro, den un bishita ofisial di dos dia na Colombia, a reuní ku presidente Juan Manuel Santos; minister di interior, Juan Fernando Cristo, ku eks presidentenan Cesar Gaviria i Alvaro Uribe i ku miembronan di sosiedat sivil, inkluyendo representantenan di víktimanan i komunidat indígena, entre otro.
Elmar Brok, hefe di komishon di parlamento europeo a bisa den un rueda di presa djabièrnè, ku “parlamento europeo ta apoyá esfuersonan di konsolidashon di pas.
Nos ta animá ámbos parti pa finalisá e negosiashonnan mas lihé ku ta posibel”.
“Finalmente e kolombianonan por pone fin na e konflikto ku a kousa hopi doló i sufrimentu. Na momentu di un instabilidat global i regional kresiente, nos ta mira e proseso di pas komo un oportunidat pa Colombia”, asina Broa a agregá.
E d iputadonan a señalá ku Union Europeo ta dispuesto na apoyá Colombia atraves di un kontribushon finansiero di 575 mion euro durante próksimo kuater añanan.
