Direktor di Eiffel Toren ta retirá pa motibu di ekskluí trahadónan femenino

PARIS, Fransia (AFP).- E kompania ku ta manehá Eiffel Toren a duna di konosé ku su direktor lo laga e funshon na final di aña, despues di un polémika generá pa motibu di no a laga su trahadónan femenino traha durante bishita di un grupo religioso hindú.
Patrick Branco Ruivo, ku ta na kabes dje monumento di Paris for di 2018, lo bandoná e puesto na fin di aña, segun Sosiedat di Eksplotashon di Eiffel Toren (SETE). E bishita dje movementu spiritual hindú “Bochasanwasi Akshar Purushottam Swaminarayan Sanstha’ (BAPS) a tuma lugá dia 5 di sèptèmber, pareu ku inougurashon di un tèmpel hindú serka di Paris.
SETE na e okashon ei a rekonosé ku e delegashon hindú a solisitá pa organisá e bishita limitando “interakshon di hende muhé”, pero ta agregá ku “e kondishonnan ei no mester a keda aseptá”.
Segun e empresa, un investigashon interno a trese na kla “fayonan i defisiensianan di operashon” den e organisashon durante dje bishita, durante kua hende muhé a keda apartá, “loke no ta aseptabel”.
Dos dia despues di bishita dje delegashon hindú, e monumento a keda será debí na wèlga di trahadónan komo protesta pa e desishon ei, ku tambe a keda kritiká di parti di polítika, inkluso e alkalde di Paris, Emmanuel Gregoire.
E siudat di Paris ta doño di Eiffel Toren i akshonista mayoritario dje empresa ku ta eksplot’é. Mas ku 6 mion persona a bishitá e símbolo turístiko aki di Paris den 2025.