BOGOTA, AP.- Un di e dirigentenan polítiko di Forsa Armá Revolushonario di Colombia a anunsiá djaluna ku e lo no asumí su puesto komo senador dia 20 di yüli.
Den un karta Ivan Marquez a señalá vários motibu dikon e no ta wòrdu permití pa asumí, entre nan e investigashon di fiskal kolombiano i agensia antidroga merikano DEA kontra Jesus Santrich, un otro miembro di FARC i kende ta detené den un prizòn na Bogotá i akusá pa e gobièrnu di Merka pa Narkotráfiko i pedido di ekstradishon.
E partido polítiko di FARC, a eksihí libertat inmediato di Santrich i mas di 600 eks gueriero ku ta den prizòn.
Marquez a señalá ku “pas na Colombia ta pegá den retnan di traishon”.
Presidente Juan Manuel Santos a bisa vários biaha ku esnan ku no kumpli ku e akuerdonan di kompromiso ku legalidat lo wòrdu sentensiá.
E designashon komo senador di Marquez tabata komo parti di e akuerdo di pas firmá mas di un aña i mei pasá pa e gobièrnu di Santos i FARC. E eks gueria, kual a kombertí den un partido polítiko, a logra 10 puesto, sinku den Senado i sinku den Kámara di Representante.
