BARCELONA, SPAÑA, AP.- E presidente katalan kita di su puesto, Carles Puigdemont, a pidi pa tene kombersashon ku su atversario, presidente gobièrnu spañó Mariano Rajoy, despues di un elekshon regional na Catalonia kual a duna independístanan mayoria den Parlamento.
Rajoy a primintí ku e lo papia ku e gobièrnu nobo basta esaki no violá Konstitushon.
“Mi lo hasi un esfuerso pa dialogá ku e gobièrnu ku sali na Catalonia, pero mi ta spera ku esaki ta bandoná e desishonnan unilateral i no violá lei”, asina Rajoy a bisa.
Den un konferensia di prensa na Bruselas, kaminda Puigdemont a refugiá kasi dos luna pa evitá di wòrdu detené pa promové independensia, Puigdemont a bisa ku e resultado di elekshon ta un inisio di un “era nobo” pa Catalonia.
Puigdemont a deklará dispuesto na reuní ku Rajoy sin kondishon na kualkier sitio den Union Europeo basta no ta Spaña. “Mas di dos mion persona ta na fabor di independensia na Catalonia”, asina Puigdemont a bisa. “Ta vital pa nos rekonosé i realisá i haña un solushon”.
El a agregá ku e lo regresá Barcelona si Parlamento skoh’é komo presidente di e gobièrnu, ounke no ta evidente si e lo haña protekshon legal komo funshonario skohé.
