CARACAS, Venezuela (AFP).- E dirigente opositor Freddy Superlano, konosí pa a gana gobernashon di Barinas, e tera natal di Hugo Chavez, a risibí libertat kompleto den kuadro dje lei di amnistia na Venezuela, segun e propio opositor a duna di konosé.
E instrumento ta un inisiativa dje presidente interino Delcy Rodriguez, ku a pusha pa e lei na momento di a asumí poder despues dje kaptura di Nicolás Maduro di parti di Merka. Ekspertonan tòg ta kritiká e lei resien lansá konsiderando ku e ta ekskluí hende.
Superlano a sali for di prizòn dia 8 di febrüari durante di un proseso di liberashon di prezunan polítiko ku a start un luna promé ku e gobièrnu di Rodriguez i ku a avansá poko poko. Na e okashon ei el a haña libertat kondishonal . “Awe, despues di kasi 19 luna, nos ta rekuperá e libertat ku a kita for di nos pa motibu di ta pensa otro i di a defendé nos konvikshonnan, loke na ningun momento nos lo duda pa sigui defendé”, segun Superlano a skibi riba X.
E dirigente di 49 aña a publiká un video ku ta mustra kon un agente polisial ta lesa un notifikashon kaminda ta “referí na kada un dje medidanan tumá kontra di su persona”. Despues di esei, dos agente a kita e banchi elektróniko for di su ènkel di pia drechi.
Superlano a traha huntu ku e lider opositor Maria Corina Machado den e kampaña promé ku elekshon presidensial di 2024 i a keda arestá dos dia despues dje reelekshon hopi diskutí di Maduro. Ademas e tabata diputado di Asamblea Nashonal (2016-2021) i tabata kordinadó regional dje partido Voluntad Popular.
