Luna di mama
Giselle Thijssen Mc William
Nos a drenta luna di Mei; luna ku ta selebrá Dia di Mama i nos di Djasabra kier a dediká henter e luna aki na mamanan. Kon nan ta sinti nan komo mama, nan eksperensia, konsehonan i hopi mas e mamanan ku nos a skohe lo kompartí den e próksimo 4 programanan. Komo e promé nos tin Giselle Mc William, aktualmente parlamentario i lider polítiko pero ku un eksperensia amplio komo periodista i trahadó den e sektor di salubridat. Kon el a manehá su trabou siendo mama di dos yu Chanel i Maurizio.
Ki ora Giselle a sinti realmente ku el a bira mama
riba e pregunta aki el a konta Djasabra ku su promé yu Chanel el a haña ku 28 aña. Tabata un momentu bon pensá, no muchu yòn pero konsiente di e responsabilidat ku esaki ta nifiká pe komo hende muhé i persona. E sa ku su bida lo a kambia. Promé ku esei su bida tabata unu ku el a hasi hopi kos ku e kier a hasi i na momentu ku el a haña yu su prioridatnan a bira otro. I no ta e hasi su mes mama pero su yunan a hasié mama. For di momentu ku e tabata sa ku e ta bai bira mama el a dediká su mes na e proseso ei. Tabata un proseso masha bunita i ku su yunan den barika ta masha dushi mes, e ta sinti nan skòp i serka di dje. El a konta algu ku e ta kòrda tempu el a kaba di haña yu, el a bai konsulta serka dòkter Capello, su ginekólogo i su yu a keda kas. Ora el a drenta den e sala di espera i a mira tur e mamanan na estado el a sinti falta di algu. I p’esei ora e wak hendenan na estado, e ta pidi pa disfrutá di e proseso. El a disfrutá e 9 lunanan te final. I ku Maurizio tabata meskos. E tin un yu muhé i un yu hòmber i ku kada un e eksperensia tabata diferente. Ku tur su dos yunan e no tabata sa kiko nan lo tabata pasobra e no kier a sa. E tabata ke un sorpresa ora e yu nase. I siendo na estado di Chanel tur hende rònt di dje tabata bis’é ku ta mucha hòmber e yu ta bin pasobra esaki i esaya. Pero pe loke tabata mas importante ta ku e yu ta bin salú. Su dos yunan tin diferensia di edat i serka Maurizio tampoko e tabata sa ta kiko. Den kaso di Maurizio su kasá tabata kere fuerte ku ta mucha hòmber i el a pidi pa ta mucha hòmber pa e tata no keda desepshoná. I aki tambe Giselle ta kòrda ku e tabata na Hulanda promé ku Maurizio a nase i su mama a bin for di Kòrsou ku e paña di batisá di Chanel i a poné den e kama prepará pa e yu. Su kasá Ben a yega for di trabou i drei wak e paña di boutismo i a puntra ta kiko ta pasando. Giselle mester a hari pasobra Ben a kere sigur ku ta yu hòmber i finalmente tabata un mucha hòmber e yu a nase tambe.
Ki tipo di mama Giselle ta konsiderá su mes
Giselle ta kere ku si puntra su yunan, nan lo kontestá ku e ta hopi strèn. E ta kòrda su yu hòmber mester a bai un kaminda i a bis’é ku e esta Giselle ta konosí pa bisa NO. Maurizio a bis’é ku den tur su amigunan, e ta esun di mas strèn den tur e mamanan. “El a pone e spil un ratu dilanti di mi. Maurizio tin 17 aña, i dado momentu bo mester sa ku bo tin di laga lòs. Ku Chanel tambe mi ta un mama hopi ‘protective’ pa diferente motibu”. Giselle a konta ku su mama no tabata asina ‘protective’ ku nan pero su mama semper tabat’ei pa nan i si nan hasi algu robes, nan ta haña. Pero no manera Giselle ta. Ounke e ta rekonosé ku esaki tin di aber ku hopi kos. Bayendo den pasado di su bida, el a konta ku dia e tabatin 7 aña su tata a kai será na Cuba pa 7 aña largu. Tabata momentunan masha difísil pa nan i e tabata hopi pegá ku su mama. Na chikí el a siña ku hende grandi no ta sin mas ta respetá nan pero nan mester respetá tambe. E ta kòrda na chikí kon hende grandi tabata aserká e i su ruman muhé ku ekspreshonnan hopi kruel pa ku nan. E tabata asumí e ròl di protehá su ruman muhé, ounke e tabata mas chikí. El a lanta ku e no ke e kos ei pasa ku su yunan pa niun hende hasi nan daño. Ta kosnan ku e mes a pasa aden i p’esei ke protehá su yunan. I den polítika esaki a bira mas fuerte ainda. Su tata no tabata aktivo den polítika pero su tio si. E yunan di su tio no tabata biba aki i e ta esun ku ta Mc William i su ruman muhé i nan a eksperensiá kosnan no agradabel komo un Mc William. I nan a haña nan tambe den e tipo di kosnan ei. I el a purba krea un muraya rònt di su yunan dor di ta strèn pero ku amor. Papia hopi ku bo yunan pa nan no faya pa hende no haña chèns ku nan pasobra den e mundu aki ora Giselle su yunan, mama, tata i rumannan hasi algu ta mundu ta bin abou djis pasobra ta su yu i su famia. Komo mama e kier a protehá nan pasobra ta su responsabilidat komo nan ta su yunan.
Kiko e kier a hasi otro siendo mama
E ta haña kisas ta ménos strèn ku su yunan. I voral e último añanan pero e tabatin di aber ku e miedu. Su yunan ta bai skol i asta na skol nan ta bira blanku di yùfrou i menernan pasobra nan ta bin di un sierto partido i kisas di e forma ei por yega na dje. E ta kere ta ménos strèn esei sigur e lo a hasi otro. Pero e ta kontentu su yu muhé Chanel awor 25 aña lo kòrd’é komo un mama strèn pero kòrdando ku semper loke el a hasi tabata e mihó pa nan.
Kiko e yunan a hasi ku a laga Giselle sintié un bon mama: Ta kosnan chikí tur dia. Hopi bia bo ta kria bo yunan i na kas nan ta esnan di mas mala mucha pero ora nan sali for di kas i hende bisa bu ku bo yunan tin bon manera, bon kurason, gradesido, eseinan ta kosnan ku ta dun’é e satisfakshon ku tur e strèn i fèrfelu ku e ta komo mama el a duna nan e base nesesario pa ta mihó hende pa nan mes i pa e sosiedat unda ku nan ta.
Giselle a traha den prensa, salubridat i awor polítika kon el a hasié i atendé alabes ku su yunan
Mi no por a hasié sin mi kasá, Giselle a kontestá nos. Su kasá ta su otro mitar, su sosten den tur loke e ta hasi pa su yunan i famia i e no ke keda sin duna krédito na su mama i rumannan ku a yud’é. No tabata fásil i voral den salubridat, polítika tambe el a bai studia lei ku ta mas ainda, wikèntnan ku e no por kompartí ku su famia pa sakrifiká pa un meta. Durante di 3 Pasku ta un ratu el a partisipá ku komementu pasobra tèntamen hopi bia ta dia 2 di yanüari. Pero el a logra tur esei ku e komprenshon di su kasá i su yunan. Semper nan a komprondé i nunka a dun’é e sentimentu di no ta komprondé. Nan ta papia masha habrí den kas i e nunka ta skonde su sentimentunan i su famia sa kiko e tabata pasa aden. E ta orguyoso di su yunan ku apesar di tur loke el a pasa aden, nan a sa di sigui den bida ku kara na laira.
E mama ku Giselle ta awor aki ta esei tabata su deseo promé ku el a bira mama Giselle a bisa ku ora bo ta yòn, bo ta un tiki idealista, bo ta e mama, yu i bo ta realisá ku mama ta trese hopi desaroyo pa abo komo hende pa bo dil kuné. I bo ta realisá kuantu kos mama ta hasi, kada yu ta pidi otro tipo di atenshon. E no por a imaginá su mes ku mama lo ta asina aki. Pero e sa si ku tabata algu di responsabilidat. Awor aki su yu muhé ta grandi pero tòg Giselle ta sintié ainda responsabel pe i e tin di sigui hasi e trabou pa nan i e ta spera esaki lo sigui tambe den futuro.
Ki Giselle ta pensa di e frase “mi ta mama i tata”
riba e punto aki Giselle a bisa ku tur hende, tur mama tin tendensia di ta mama i tata apesar ku e kasá tei pasobra hopi bia e hende muhé e manera di pensa i hasi ta pone nan kue e ròl dòbel ei. I asta tin bia nan tin e tendensia di bisa e kasá ku awor si esaki ta pe hasi. Den su kaso por ehèmpel, Giselle ta kòrda ku su yu hòmber e mester a splika sierto fase di bida i el a bisa su kasá ku esei si ta di dje i kaminda mester e lo kai aden. Esaki ta den DNA di hende muhé pero mester tene kuido pa no pasa e liña i ekskluí e tata ku tei presente pa e asumí su ròl.
E mihó regalo
Papiando di e regalo di mas grandi ku su yunan por dun’é ta ku nan ta salú i felis den tur loke nan ta hasi. Pa kada kos chikí, kada bes ku e wak su yunan ta hasi i ta felis nan ta yen’é. S su yunan ta bon, e ta bon, ku nan ta felis. Esei ta e regalo di mas grandi ku e por haña i pidi di su yunan komo mama.
I komo polítiko, parlamentario kiko Giselle lo tin gana di mira kambia pa mamanan por tin mas tempu ku nan yunan
Giselle a bisa ku e mama ta importante pero tatanan tambe ta importante. I esaki pasobra e ta yuda e mama. Den e kaso aki nan a kuminsá ku e trayekto di lei di verlòf pa tatanan pa nan haña 5 dia di verlòf. E ta den ámtenar 2 dia i tin kaminda ta regla pero otro kaminda no. Ta bon pa e tata tei presente den e promé dianan ku e muhé haña yu komo sosten. Regla esaki ta kuestion di derechi di e hende hòmber i e ta yuda e hende muhé. E ke mas pero ta kuminsá ku 5 ounke e ke mas. I e hende muhé tambe, for di 2012 sra. Eisden i sr. Puriel a oumentá e verlòf di embaraso i awor aki e ke hasié mas ainda. E 2 simannan ta un balor agregá pa e famia. E sèn ku mester paga ta un invershon atraves di e mamanan ku ta mas trankil, e yu a haña mas atenshon i otro temanan manera ora un yu nase i tin di bai den intensive care di baby, miéntras ku e verlòf di embaraso ta kuminsá konta ora e yu nase. Esaki siendo ku ora e yu sali di kuido intensivo e mama por atendé algun dia so kuné. Esei tambe e tin kambio di lei kla pe. Pero mas aleu temanan di menstruashon, menopousa. Dia 28 di mei lo tin e evento Menstruashon solidario kaminda Giselle ke papia riba pobresa di menstruashon. E pobresa ei tei den e pais aki i no ke papia di dje. Meskos ku tin problema pa kumpra kuminda tin problema tambe pa kumpra produktonan di menstruashon. Giselle ta kere ku mester papia mas aleu di e parti di menopousa ora ta trata di hende muhé. Ta hasi manera e ta algu masha normal pero e no ta asina. E menopousa ta hasi un impakto hopi grandi den bida di e hende muhé. Mentalmente, físikamente, den relashon i mester papia riba dje i tene kuenta kuné. Meskos menstruashon, tin hopi hende muhé ta drumi na kama pasobra no por lanta di doló di e menstruashon pero ta ferwaktu pa e lanta normal i ta bisa ku e no ta malu. Ta bisa e hende muhé pa e stòp di eksaherá i e kos aki ta tumando lugá i nan tin responsabilidat di papai di dje i no hasi manera nos mayornan.
Konseho pa futuro mamanan
e kos di mas importante ta pa stima e proseso di ta mama. For di ora bo sa ku bo ta na estado te ora e yu nase, te bai skol, e sali for di kas, ta leu di bo, disfrutá di e momentunan ei, e fasenan. E mucha ku bo ta yama mala mucha ta kambia i tin bia bo asta ke pa e hasi algu di mala mucha, e mucha chikí ei bèk. Tempu ta pasa hopi lihé, disfrutá di bo yunan, disfrutá di e kosnan bon i esnan ménos bon.
