…Komo organisashon FARC a stòp di eksistí pero su (èks)miembronan ku no ta di akuerdo ku e areglo di pas ketu bai ta sembra teror na Colombia…
BOGOTA, Colombia (AFP).- Desedientenan di FARC a retené 29 polis i militar den un lugá skondí den zùitwèst di Colombia, kaminda gobièrnu a lansa un ofensiva pa para e violensia di narkotráfiko.
Ministerio di Defensa a referí na “intento di asesinato i despues sekuestro di 29 miembro di Forsanan Públiko”, aktividat ku a tuma lugá den e serunan dje departamento di Cauca ku ta bou kontròl di rebeldenan di Estado Mayor Central (EMC), ku nunka a aseptá e akuerdo di pas firmá den 2016 ku e grupo di gueria marksista.
Videonan publiká pa outoridatnan ta mustra un vehíkulo militar na kandela miéntras ku grupo di personanan ta tira esaki ku piedra. Otro publikashon ta mustra polis anti motin lansando granada di huma miéntras ku nan tabata avansá den un kaya meimei di tirunan.
E susesonan a tuma lugá den e munisipionan di Argelia i El Tambo, zona kaminda ta registrá un dje konsentrashonnan di mas grandi di kultivo di kokaina, segun Nashonnan Uni.
Gobièrnu a duna di konosé ku EMC ta responsabel pa e akshonnan “ehekutá ku nan miembronan bistí na sivil pa infiltrá i atentá kontra di integridat” di esnan uniformá.
Den un mensahe riba e ret sosial X, e presidente Gustavo Petro a duna di konosé ku EMC ta aktua “ku desesperashon i pa e motibu ei ta usa e poblashon sivil”.
