FORT-DE-FRANCE (AFP).- Disturbio serio na Martinique ku kandela i sakeo pa motibu di kosto di bida kada bes mas karu, a topa ku e tenshonnan rasial i sosio ekonómiko na e pais karibense aki kolonisá pa kasi kuater siglo kaba pa Fransia i marká pa su pasado di sklabitut.
“Les bekés’ (europeonan di ántes) ta imponé nan lei”, segun un señora di e isla, ku ta sufri pa yega na fin di luna, refiriendo na e blankunan desendiente di doñonan di katibu ku tin den nan man gran parti dje poder ekonómiko dje isla ku na e momento aki ta un teritorio ultramar franses.
Tres dje shete gruponan minorista grandi ku ta den sentro dje polémika debí na preisnan haltu di produktonan alimentario komo 40% mas karu ku na Fransia ta propiedat di “bekés” den un komunidat di mas o ménos 3.000 persona, den un poblashon di 360.000 habitante dje isla.
E protestanan ta plamá rònt e isla ku vários anochi di disturbio ku heridonan, desena di detenido, sakeo i kimamentu di vehíkulonan. Outoridatnan a dekretá un toke de keda nokturno.
Hopi dje krítikanan pa e preisnan ta dirigí kontra dje prinsipal grupo dje sektor, GBH, fundá pa Bernard Hayor, di 89 aña, ku un fakturashon di mas o ménos 3.000 mion euro (kasi 3.300 mion dollar). Su fortuna familiar, kalkulá na 300 mion euro, ta figurá na puesto 431 di e 500 hendenan mas riku di Fransia, segun e revista Challenges.
“Bernard Hayot, promé ku e ta un ‘beké’, ta un lider empresarial, e ta un kapitan di industria”, segun Emmanuel De Reynal, un publisista di 58 aña, ku tambe ta un ‘beké’. “Mi no ta mira pakiko mester tene kuenta ku su orígen rasial”, segun el a agregá.
Pa otronan, e eksitoso empresarionan aki ta hòmbernan blanku ku tin un kos komun: nan antepasadonan tabata e doñonan di katibunan.
Den 1635, Fransia a kolonisá Martinique i a duna tera grátis na fransesnan. E isla despues a biba mas ku dos siglo di “ekonomia di katibu”, ku mas di 80% di katibu den1789, segun e historiadó Frederic Regent.
“Nos a heredá un historia teribel”, segun De Reynal, kende den 1998 a firma, huntu ku vários sentenar di bekés, un teksto ku ta denunsiá e “inhumanidat di sklabitut”.
Despues di abolishon di sklabitut den1848, tur e propietarionan a keda kompensá pa estado, ku aproksimadamente 400 franc dje tempu ei pa kada katibu. E katibunan mes no a risibí nada.
