WILLEMSTAD.- Djabièrnè awor produktornan lokal ta kuminsá para na Sha Caprileskade pa bende nan produktonan. Esaki ta loke ku direktor empresarial di MEO, sra. Mariella Olaria-Maduro a duna di konosé na EXTRA.
Esaki ta sosodé despues ku den dianan di fiesta tras di lomba, e sinku último barkunan di fruta venezolano ku tabata pará na Sha Caprileskade a bandoná Kòrsou, i no por regresá, debí ku frontera ku Venezuela ta será.
Dia 30 di aprel i 1e di mei, e barkunan venezolano a bandoná Kòrsou. Riba dicho fecha nan alargashon di un luna di estadia a terminá i mester a bai.
Mirando esaki, ya e produktornan lokal ta kla pa para bende fruta, berdura i boka dushi na Sha Caprileskade. Pa loke ta trata kos di boka dushi por kumpra tambe manera pastechi, empaná, johnnycake etc.
Sra. Olaria-Maduro a splika ku ta trata aki di un proyekto piloto di 3 luna. Despues di djabièrnè lo evaluá e akohida ku e produktornan lokal a haña na Sha Caprileskade. Hopi produktor ta hopi entusiasmá pa para na e sitio i bende nan produkto.
Mester bisa ku ainda e otro parti di Sha Caprileskade no ta kla, i mester keda drechá. E echo ku ainda trabounan di renobashon ta stanká ta debí na finansa.
Si e barkunan di fruta regresá, nan por para na e sitio aki tambe.
Pues ta interesante pa mira si nos hendenan ta sostené nos mes hendenan lokal, pasobra esei tabata e gritu na momentu ku aña pasá e problema di seramentu di frontera a start, i ku barkunan venezolano mester a bandoná Kòrsou. Tabatin un diálogo organisá pa MEO, kaminda a sali afó ku pueblo ke pa e barkunan di fruta keda para na Sha Caprileskade, pero den kombinashon ku produktornan lokal. Awor e momentu a yega pa produktornan lokal, i nan mester ta konsistente pa para na sitio bende nan produktonan.
