‘Djadumingu di Otrobanda’

… Sr. Muryad de Bruin, direktor di Ofisina di Turismo, C.T.B. …

WILLEMSTAD.- Riba inisiativa di Ofisina di Turismo, CTB, ta kuminsá ku un aktividat mensual, pues 1 biaha pa luna, riba djadumingu den nos sentro di siudat, den e kaso aki parti di Otrobanda, kual ta trese tantu e abitantenan, pueblo di Kòrsou komo nos turistanan huntu pa eksperensiá nos kultura, músika, gastronomia i pa selebrá e herensia i e ambiente úniko di Otrobanda.
Sr. Muryad de Bruin, direktor di Ofisina di Turismo, C.T.B. a presentá e evento ‘Djadumingu di Otrobanda’.
‘Djadumingu di Otrobanda’ ta duna un bunita oportunidat pa selebrá loke ta di nos. Otrobanda, ku su historia riku i karakter úniko, ta e lugá ideal pa trese nos kultur, nos músika i nos gastronomia huntu. Pa di e manera akí sigui fortalesé e bario komo un lugá vibrante tantu pa nos komunidat komo turistanan.
E inisiativa ta yuda trese mas aktividat tambe riba un djadumingu. E evento ta krea un oportunidat tambe pa mikro empresarionan por presentá nan produktonan tantu na nos komunidat lokal komo turistanan.
Músikonan ta haña e oportunidat pa presentá nan talento i kreatividat.
Ofisina di Turismo ta invitá komunidat lokal pa sali, eksplorá i bin deskubrí mas di Otrobanda i eksperensiá un parti outéntiko di Kòrsou i na mes momentu kompartí ku nos turistanan.
E evento ta mustra e importansia di traha huntu: abitantenan, empresarionan lokal, sektor kultural, sektor kulinario, industria di turismo, komunidat i gobièrnu, tur kontribuyendo na e mesun meta.