Djadumingu ta bira dia di deskanso atrobe

 

WILLEMSTAD,- Lider di partido Pueblo Soberano Jaime Cordoba ayera a keda huramentá komo minister di Desaroyo Sosial, Labor i Bienestar (SOAW). ‘M’a ninga dos bia kaba, awor mi a asept’é pa bira minister. Awor mi sa kon parlamento ta traha i mi sa tambe kon mi por traha ku nan, pa mi no tin problema ku Parlamento.’

Pa Cordoba komo minister di SOAW ‘e hende’ ta mas importante. ‘E hende di Kòrsou, e famia. Awor nos ta bai pone e famia sentral. Ta p’esei mi ta bai introdusí un ‘Sunday law’, ku ta nifiká djadumingu liber. Pa famia por ta huntu na kas durante e djadumingu. Pa no laga tur hende traha, traha, traha. Papa Fransisco a bisa masha kla mes ku pa famia ta bon ku nan tin tempu huntu i no traha tur dia.’

Segun Cordoba doñonan di trabou lo bisa ku esaki no ta bon pa ekonomia. ‘Pero no por ta ku un kos bon pa ekonomia ta un kos malu pa famia. I mi sa ku nan no ke tende esaki, pero pa nos famia ta sentral.’ Cordoba ta enfatisá ku komo minister di SOAW e lo bin ku e medida.

Cordoba  tambe ta reakshoná riba  e rumornan ku tin  hopi malkontentu bou di trahadó di ministerio di SOAW. Cordoba: ‘Den tur ministerio tin hende ku no ta kontentu. Ora mi ta drenta den ministerio mi lo papia ku tur hende, mester buta hende traha.”

Segun Cordoba te ainda no a tuma lugá traspaso ofishal di minister di SOAW saliendo Ruthmilda Larmonie-Cecilia pa minister nobo Jaime Cordoba. Pero nan dos ta enfatisá ku tin hopi bon kontakto entre nan, i nan ta di mesun partido. Nan ta sigur ku e traspaso lo pasa na un manera fleksibel.

SHARE

LEAVE A REPLY