Djaweps awor tur tur ku Akisha Albert

… Akisha Albert …

WILLEMSTAD.- Nos a drenta den e siman di amor. Den e siman di amor aki algu grandi ta bai ser hasí pa Akisha Albert. Ya for di djabièrnè ei por a tuma nota kon eufóriko e aplouso pa Akisha Albert tabata na momentu ku su presensia a ser rekonosé pa presidente di AMAK Manfred Gomes.
E siman aki ta e siman dediká na Akisha Albert kende dia 16 di desèmber 2018 a keda skohé komo e di 6 muhé mas bunita na mundu. E intenshon ta pa e siman Kòrsou  regal’é un Toyota Rav 2019. El a saka kara di Kòrsou 16 di desèmber 2018. Awor ta keda na nos komo pueblo dun’é un regalo ku e meresé.
Den kuadro di loke tei tuma lugá djaweps awor ta asina ku portanan di Spoonz ta habri for di 9 or di mainta ku presentashon hinter dia di diferente artista. Entrada ta grátis. E programa na Spoonz ta terminá 7 or di anochi. E intenshon ta pa durante di 10 ora e pueblo por yega Spoonz i depositá loke ta na nan kurason.
Garage Cordia a duna di nan parti otorgando un deskuento grandi pa e Toyota Rav 2019 ku nan lo lansa riba merkado. Pa e proyekto aki nan a laga e Toyota Rav na 50.000 florin i si tur kos kana bon nos Akisha Albert lo tin e honor pa kore e promé na Kòrsou.
A base di petishon dje pueblo, Julius Koko a tuma e inisiativa pa organisá lokual ku ta bai tuma lugá na Spoonz, pasó Akisha Albert meresé. Ta bon pa apuntá ku despues dje akto di rekoudashon na Spoonz lo tin un magno show di vürwèrk riba tereno di Amstel na enkargo di 3D Fireworks di Gustavo Semeleer.
Tumando na kuenta ku hopi hende kier hasi transakshon online, por hasi esaki for di awor riba e kuenta di Akisha Albert na MCB. E number di kuenta ta 334125107. Lo tin mashinnan di swipe presente na Spoonz pa tur esnan ku kier hasi uso dje servisio aki. Kòrsou tur kos ta den bo man. Akisha meresé.

SHARE

LEAVE A REPLY