WILLEMSTAD.- Ayera un grupo di simpatisante i koleganan di e lider di partido KEM, Michelangelo “Lo” Martines a sali den karavana for di nan sede na Roodeweg i a bai manifestá na Kas di Korte. E manifestashon tabata pasombra na e momentu ei tabata trata apelashon dje desishon di wes komisario pa e 60 dia di enkarselashon di Martines ku a tuma lugá siman pasa dia 26 novèmber. E grupo aki a keda guiá pa alrededor di 9 patruya di polis. Na Kas di Korte e simpatisantenan tabatin pankartanan, kaminda ta indiká ku “Nos a bin pa bai ku nan lider”. Alabes nan tabata grita nòmber di Martines.
Abogado di Martines, mr. Eldon “Peppi” Sulvaran a sali i papia ku e simpatisantenan indikando ku e ta sinti ku e tratamentu di e kaso a bai bon i el a hasi su bèst. E simpatisantenan ku sr. Anthony Godett na kabes a keda di bai sede despues dje manifestashon pa nan mira kon ta kontinuá i atendé ku un plan B. Paso nan ta di opinion ku no tin nada kontra di nan lider, Michelangelo Martines. EXTRA a komprondé ku djaweps awor, esta mañan desishon lo kai riba e apelashon. Mañan djaweps 5 desèmber ta hasi 1 luna ku RST a detené Martines riba sospechoso di trafikashon di droga i labamentu di plaka den periodo di 2019, 2020 i 2023.
