Djis drenta i sera konosí ku e mundu digital

1133

Fundashon Bienestar Muizenberg a duna diferente kurso na nos grandinan pa siña traha di forma digital. Nan a haña sosten di ML Belasting Consulent kual na su turno ta dunando diferente kurso tambe den e direkshon aki. Banda ku diferente instansia a bai mas agresivo den direkshon digital, COVID-19 tambe a kai aden i ku a hasi altamente nesesario pa nos por dominá e kòmpiuter òf e opshonnan riba telefòn pa por atendé asuntunan importante online esta digital. Entre otro bankonan tambe ta konsehá pa atendé ‘online’ ku diferente pago ku ántes nos grandinan en partikular tabata bai para den rei na banko pa hasi. Ku e normal nobo tin hopi kambio ku a tuma lugá i ku ta sigui na kaminda.

 

Kurso digital pa grandinan….

 

Militza a splika ku e kurso tabata un idea di Marie Louise teniendo na kuenta ku na e fundashon di Muizenberg tabata organisá diferente kurso pa grandinan. Mirando e normal nobo nan tabata preokupá kon grandinan ta atendé ku esei, Banko ta importante pa nos tur i pa nos grandinan. Komo fundashon nan a yuda  e hendenan ménos pudiente durante di COVID i tambe yena asuntunan di ònderstant. Ora a bira mas trankil Marie Louise a aserká Militza pa e kurso digital. Marie Louise tabata preokupá kon grandinan ta bai atendé ku e parti di bankonan ‘online’. Ta e direkshon ei nan mester bai i Mare Louise tin un plan i presentashon kla kaba pa yuda grandinan. Asina e fundashon i ML Belasting Consulent a uni i den un siman di tempu nan a hinka e programa den otro. E reakshon segun Militza tabata enorme. Fundashon Bienestar Muizenberg tin su sala i asina mes nan a logra pèrtá 100 hende den sala i a wanta vários pafó ku no por a akomodá mas. Intenshon tabata un presentashon so ya ku esaki ta ML Belasting Consult su trabou. A hasié kompletamente grátis i e fundashon a logra haña kooperashon di tantu MCB komo Banco di Caribe interesá pa a kooperá. Tambe a manda representante di e bankonan pa asina por fasilitá nan klientenan durante di e kurso. A kasi tene e kursistanan na man i laga nan kana i sera konosí ku e mundu digital. Despues di e kurso, e fundashon a keda habrí pa dos siman mas pa sigui ku e grandinan. Militza a bisa ku nan a stòp di tuma 130 hende ku a sigui e kurso. I te ainda tin petishon pa mas kurso. E fundashon no a pone mas kurso pero Marie Louise si a sigui ku algun kurso mas.

 

Marie Louise Jansen;nan no ta bobo pero no ta nan époka…

 

Marie Louise Jansen ta di ML Belasting Conculent. Den prinsipio el a bisa ku nan a dirigí e kurso pa personanan di 50 aña bai ariba pero no a ekskluí si tin hende mas hóben ku tambe no sa kon traha ku digital. No ta asina ku esnan mas hóben si tin e dor. Ta tur hende por a bin e kurso pero e enfoke tabata 50 aña bai ariba. I mayoria den e sala durante di e kurso tabata riba e edat ei. Digital no ta e grandinan su mundu. E mundu digital ta bisa bu djis drenta sera konosí. Manera ántes nos a lanta tende nos grandinan bisa pa drenta i sera konosí. Awendia e grandinan ta djis lur e mundu digital i kore limpi bai. Hopi ta asta klap sera ku e idea so. I p’esei nan a hinka un programa den oro pa splika e hende kiko ta Internet, kiko ta ‘online’, kiko ta wifi, kiko ta data. Di eksperensia por mira ora e grandi puntra e yu òf nietu kiko esei ta, hopi bia no tin tempu pa duna nan e splikashon. I p’esei a kuminsá for di e parti di Internet i splika kon por subi via Google, kiko tur por hasi kuné. Tambe a splika ku nan mester di un e-mail adrès. “Den sala mi a puntra nan ken tin un ‘smart phone’ i tur a keda wak mi, pero mi a puntra ken tur ta app ku e yu i einan mayoria a hisa dede i esei ta konkluí ku mayoria tin un ‘smart phone’. Nos a splika nan ku asina bo tin ‘smart phone’ i bo por app ta nifiká bo tin e-mail adrès. Pero ya mi sa kon e kos ei a bai, a bai ku mamai i papai kumpra e telefòn, djis hink’é a kos den dje i kla. No a aktivá e e-mail ni bisa nan e password”, Marie Louise a splika. Tur loke bo ke hasi di pago bo mester di un e-mail adrès i asina el a subi e nivel di kiko tur tin te pa yega na e ‘online banking’. A skohe 4 banko lokal mas usual i di einan a bai den nan programa di mustra kon ta registrá, kon ta drenta mas ku tur kos no tene miedu di e programa, e sèn no ta kita si abo no disidí di manda e sèn. E grandinan tin pániko ku si nan manda sèn ‘online’, ku e sèn no ta yega kaminda e mester yega. A yuda nan traha ‘template’, paga tinu riba sierto aspektonan. I tambe a splika nan kiko e ta na papiamentu pasobra hopi no ta dominá e ingles.  No ta e grandinan su lenga ni idioma i durante di e kurso a enfatisá ku nan no ta bobo pero simplemente e mundu digital no ta di nan époka.

 

Segun nan tèmpo….

 

A tuma un ora di kurso pero esei no tabata sufisiente. E hendenan no kier a bai. Tabatin hopi pregunta ku nan mes no a ni para ketu na dje. Ta masha hopi pregunta tabatin entre otro kon ta drenta den kasa di banko ku nan sistema. A bai un tiki mas slou di nan tèmpo normal. Nan meta tabata e nesesidat serka e hende grandi. Marie Louise a yega di haña grandinan na kas ku nan laptop pa yudansa i esei a lanta e nesesidat pa e kurso ei. ML Belasting Consult a organisá diferente di e kursonan aki banda di tabata envolví tambe den esun na Muizenberg. I miéntras tantu e petishon ta drenta tantu personalmente komo den grupo Marie Louise lo sigui konsentrá riba e kursonan aki. E ta sigui pa asina tur por haña e oportunidat di sera konosí ku e mundu digital.

 

No hansha….

 

E grandinan a kuminsá komprondé ku nan tin di bai over na digital i ‘online’. Marie Louise a pone dilanti na e grandinan ku ta rekomendabel pa nan bai ‘online’. El a hasi esaki usando komo ‘joke’ i wega ku e grandinan usando asta nan mes palabra pa nan por kapa mas lihé. Hende mester mira i ora hasi wega den bon tera, dor di e wega  e kos ta bira serio.  I loke ta masha remarkabel ta ku ora kada un di e kursonan aki kaba, e grandinan no ta bai, nan tin nesesidat di keda kombersá. Un di e motibunan ku e hende grandi tabata gusta bai para na banko ta pa sosialisá pero awor por hasié pa medio di e-mail tambe, esei ta loke Marie Louise a laga e grandinan komprondé. I tampoko nan tin mester di hansha pa hasi un pago si nan por hasié ‘online’. I no tin mester di lanta tur sèn warda den kas. E sèn ta keda na banko i ora mester ta lant’é. Tambe ta splika e grandinan pa no tene miedu di usa e sistema ‘online’ pasobra por djis kanselá loke ta hasiendo. I Marie Louise su kursonan digital ta kontinuá via di su ofisina di ML Belasting Consult. E ta hasié den grupo òf privá.

 

Un ta yuda otro……

 

Fundashon bienestar Muizenberg ta hasi hopi pa komunidat. I pa e proyektonan aki nan mester ti sèn. Nan no ta haña supsidio ni donashon. Militza Daal a bisa ku hopi kos e ta hasi riba su mes i ku su propio entrada. E ta konsentrá riba e hendenan ku ménos entrada i ménos posibilidat. Militza ta traha mas di 30 aña pa Reklasering i e konosé situashon di famianan i nan nesesidat El a mira hopi kos ku otro no ta mira. I p’esei nan ta focus riba e hende di nesesidat. Situashon di Kòrsou tampoko ta masha bon pero esei no ta wante. E mes ta krea e posibilidatnan manera den e kaso aki el a krea algu pa e haña entrada pa e por sigui yuda otronan. El a pone e sitio kaminda e fundashon ta pa e ta un sentro di bario. El a hasi un parti komersial i un parti sosial pa aportá na komunidat i bario. Mirando e situashon na Kòrsou ku hopi hende  a pèrdè entrada, hopi kas i famia ta haña nan den difikultat tantu sosial ku preisnan ku a subi i e situashon a bira fèrfelu. Komo fundashon nan a sinta pensa kon nan por agregá balor pa komunidat. I e idea a bin pa nan usa e parti di kushina pa nan bende kuminda salú, kuminda krioyo. Tambe nan tin un gym na e edifisio ei mes den Muizenberg pa e hende por move. I asina nan por hasi un tipo di fundraising pa haña fondo i kontribuí na bienestar di otro hende. Militza a bisa ku nan ta invitá agentenan di benta pa bende kuminda pa nan i e ta gana un salario pa luna dor di simplemente buska algun kliente pa luna. Hasiendo uso di nan servisio ta aportá tambe na komunidat i asina nan por hasi mas na komunidat. E proyekto yama “un ta yuda otro”.

 

LAGA UN KOMENTARIO

Please enter your comment!
Please enter your name here