Un sala yen a papia palabra kla; Nan no ta bai warda 4 luna atrobe
WILLEMSTAD.- “Despues di a splika e pakiko trahadónan den enseñansa tin derechi di haña trede di ougùstùs 2024 i tambe kiko gobièrnu a i falta pa paga nos, nos a trata e karta ku nos a risibí di minister di BPD, señora Kimberly Lew-Jen-Tai riba djárason 3 di sèptèmber 2025 ku ta nèt 1 dia promé ku nos reunion general,”, segun Marbella Felipa presidente sindikato DOEN despues di e reunion di djaweps anochi.
Konsiderando kontenido di minister Lew-Jen-Tai su karta i posishon di trahadónan den enseñansa den sala, sala a duna komo mandato pa pidi un reunion urgente ku e minister di BPD. “Sala a pidi alabes pa pone un fecha komo deadline ya komo ku nan no ta interesá pa bolbe warda 4 luna pa un reakshon di parti di gobièrnu.”
Palabrashon final ta ku dependiendo di e reakshon di minister e trahadónan miembro di DOEN lo bini bèk reunion general. Nan a palabrá tambe ku nan lo aserká e 20 skolnan ku djaweps nochi no tabata por ta presente, pa nan tambe ta presente na siguiente reunion general kaminda lo duna entre otro resultado i/o reakshon di minister Lew-Jen-Tai. Di e sobrá 70 skolnan, ku sí tabata tin representashon den sala, DOEN a palabrá ku nan lo mobilisá henter nan tim pa e próksimo reunion general ya menshoná!”
Tambe a palabrá ku DOEN lo bai sinta ku e otro sindikatonan ku ta den GOA , konsiderando e loke minister Lew-Jen-Tai a pone den su karta refiriendo na e sindikatonan ku ta den GOA.”
Pues tantu Sindikato DOEN komo trahadónan den enseñansa presente na e reunion general di ayera yamá pa DOEN, a haña tarea den kuadro di preparashon di nan siguiente stap den e lucha pa haña loke trahadónan den enseñansa tin derechi riba dje.
