SAN ISIDRO, Argentina (AFP).- E neurosiruhano ku a atendé Diego Maradona ora ku esaki a muri den 2020 a deklará su mes inosente. Seis otro profeshonal di salú tambe a akusá den e kaso. “Mi ta inosente i ta lamentá su morto”, segun Leopoldo Luque, kende a enkabesá e ekipo médiko enkargá ku salú dje astro di futbòl kende a muri riba 25 di novèmber di 2020 a kousa di un krísis kardio respiratorio i problema ku pulmon.
Ta trata dje promé deklarashon den e kaso penal nobo pa morto di Maradona, despues ku aña pasá e promé proseso a keda anulá meimei di un skandal ku u hues destituí pa motibu di a outorisá un dokumental klandestino dje kaso.
Luque, meskos ku e otronan akusá, ta enfrentá un kaso pa homisidio ku nan por a antisipá. E delito ta konta ku kastigu te ku 25 aña di prizòn. Tur esnan envolví ta deklará nan mes inosente. E neurosiruhano di forma sorpresivo a solisitá pa deklará, ku ta un derechi ku tur hende akusá tin den e kaso aki ku a kuminsá kompletamente di nobo. Su petishon a motivá e suspenshon di otro testigunan ku a keda sitá pa ayera, entre nan e yu di Maradona, Gianinna.
E dòkter a rechasá ku Maradona a sufri 12 ora di agonia promé ku su morto, manera a keda indiká pa estudionan forense. “Mi ta kompletamente sigur ku esei no a sosodé”, segun Luque a bisa, kuestionando otro aspektonan dje outopsia, manera esun ku a referí na e peso di kurason di Maradona. Esei ta algu, segun Luque, masha normal serka eks-atletanan.
