VARSOVIA, Polonia (AFP).- Tres dòkter polako ayera a keda kondená na kastigu di prizòn pa motibu di a tarda demasiado promé ku nan a praktiká aborto serka un pashènt ku finalmente a muri debí na komplikashon, esaki den un pais ku un dje leinan di salú reproduktivo mas severo di Europa.
E pashènt, di 30 aña i 22 siman na estado, a muri di un shòk den sèptèmber di 2021 den un hospital parti zùit di Pszczyna.
E fayesimentu a tuma lugá un aña despues ku Tribunal Konstitushonal, apoyá pa e gobièrnu nashonalista dje tempu ei, a prohibí e interupshon boluntario di embaraso (IVE) den kaso di malformashon grave dje feto.
E lei anti-IVE ta permití aborto den kaso di violashon òf insesto, òf ora ku bida dje mama ta kore peliger. Pero den práktika e ta asina restriktivo ku dòkternan tin miedu òf ta nenga na praktik’é.
E tres dòkternan a keda deklará kulpabel. Dos di nan a keda kondená na mas ku un aña di prizòn i e di tres un aña kondishonal, miéntras ku nan a keda inhabilitá pa ehersé e profeshon durante un periodo di kuater pa seis aña.
E tribunal di distrito di Pszczyna no a publiká e motibunan dje sentensia.
“E dòkternan, ounke nan mester a aktua, no a hasi praktikamente nada pa salba bida di Isabela”, segun a bin dilanti.
Morto dje hóben, ku a akudí na hospital ku problemanan grave relashoná ku e embaraso, a sòru pa un ola di manifestashon rònt e pais.
Segun sifranan ofisial, den 2024 a praktiká sosialmente 896 aborto den e pais di 38 mion abitante.
