GENEVE, SUISA.- Konseho di Seguridat di Nashonnan Uní pa motibu di su “falta di akshon” a bira un “kómplise den e masakre” na Gaza, segun e organisashon di Dòkternan Sin Frontera ta bisa den un komunikado.
“E falta di akshon di Konseho di Seguridat di Nashonnan Uní i e vetonan di su estadonan miembro, spesial mente Merka, ta hasi nan kómplise di e matansa ku ta tumando lugá”, segun e organisashon di dòkternan a denunsiá.
E Konseho di Seguridat ayera a kuminsá diskutí riba e tema, riba inisiativa dje sekretario general di Nashonnan Uní, Antonio Guterres, pa stòp e guera den Gaza pa motibunan humanitario. Ya ta bai dos luna di un guera entre Israel i e movementu islamita Hamas, ku ta na poder den e teritorio palestino.
Merka, un dje sinku miembronan permanente i ku poder di veto den e instansia mas haltu di Nashonnan Uní, a indiká di lo no apoyá e moshon.
“Ounke ku Merka ta respaldá e yamada pa pas duradero, nos no ta apoyá pa stòp e guera awor dirèkt pasobra esei lo planta simia pa un futuro guera” ya ku Hamas no tin deseo pa un pas duradero”, segun e embahador di Merka na Nashonnan Uní, Robert Wood.
Israel a primintí di lo eliminá Hamas, ku ta na poder den Gaza, despues dje atake di milisianonan islamita dia 7 di òktober ku a mata 1.200 persona, den su mayoria sivilnan. Israel despues di esei a lansa un kampaña di bombardeo ku a mata kasi 17.500 hende den Gaza.
Israel ademas a blòkia entrada pa Gaza provokando eskases di awa, kuminda, remedi i koriente den e teritorio di 362 km2 i kasi 2.4 mion habitante.
