Potrèt di Korte Supremo Argentino ta mustra momento ku outoridatnan tabata chèk dokumentonan nazi ku na a bin haña den Palasio Hudisial na Buenos Aires. Ta trata di dokumentonan di aña 1941.
BUENOS AIRES (AFP).-Hustisia argentino a haña algun shen dokumento di afiliashon na organisashon nazi wardá den archivo di Korte Supremo relashoná ku un kaso investigá den aña 1941.
E kahanan, un total di shete, a keda habrí djabièrnè di mei 9 i su kontenido ta wardá pa keda klasifiká, dokumentá i preservá riba òrdu di tribunal supremo pa investigá si nan por tin informashon relevante relashoná ku susesonan vinkulá ku Holokousto òf e fuga di nazinan pa Argentina.
Di akuerdo ku e investigashon periodístiko, un promé inspekshon dje kontenido a revelá e eksistensia di elementonan di propaganda nazi, potrètnan i sentenáres di publikashon relashoná ku di afiliashon na e yamada di Union Aleman di Gremionan, ku e símbolo nazi dilanti.
Algun dokumento ta hopi deteriorá i otronan den bon estado di preservashon, segun por a mira riba e potrètnan.
A haña e kahanan den depósito di Palasio di Tribunalnan dje kapital argentino, sitio kaminda ta archivá dokumentonan hopi bieu ku no a keda digitalisá. Korte Supremo no a duna ningun informashon riba e kaso.
Segun prensa lokal, e dokumentonan ta pertenesé na un kaso inisiá den 1941 ora ku duana e konfiská un kargamentu mandá pa un grupo aleman di Tokio pa embahada aleman na Buenos Aires.
E tempu ei a pidi intervenshon di hustisia pa investigá si e kahanan ta kontené elementonan ku por komprometé e polítika di neutralidat argentino den 2da Guera Mundial.
Den e sentido ei a habri e kahanan ku e dokumentonan i nan a keda wardá durante di dékadanan.
Despues di guera, kriminalnan nazi manera Josef Mengele i Adolf Eichmann a hui pa Argentina, ademas di algun shen kolaborador aleman.
Dia 1e di aprel último Argentina a manda archivonan klasifiká pa Merka, pa kolaborá ku e investigashonnan di Sentro Simon Wiesenthal riba Holokousto, segun a keda informá pa Minister di Defensa, Luis Petri.
Nazinan a hui pa Argentina
Ta kalkulá ku despues di guera míles di nazi a pasa òf a refugiá na Argentina. E kasonan mas resonante tabata di Eichman, kapturá den Buenos Aires den 1960 i husgá i ehekutá na Israel; Mengele, dòkter konosí pa su eksperimentonan ku prezunan, ku a skonde na Argentina i despues a hui pa Paraguay i Brasil, kaminda el a muri; i Erich Priebke, responsabel di matansanan den kambernan di gas den 1944 durante e okupashon aleman di Italia.
Priebke a bai Argentina for di unda a ekstradit’é pa Italia den 1995, kaminda el a muri den 2013 den un prizòn, sintando kastigu di bida largu.
