E dominikano Juan Carlos Avila Esaillat, kende supuestamente ta den e guera ruso kontra di Ukrania.
SANTO DOMINGO (AFP).- Rep. Dominikana ayera a atvertí su siudadanonan riba ofertanan di trabou na Rusia ku por tin relashon ku e guera entre e pais ei i Ukrania, esaki despues di a risibí denunsia riba posibel reklutamentu. Ministerio di Relashonnan Eksterior (Mirex) a hasi un yamada riba e poblashon pa “aktua ku koutela” na momento ku risibí ofertanan pa hasi un biahe pa Rusia i ku despues por resultá den aktividatnan relashoná ku e konflikto ku a kuminsá kuater aña i mei pasá.
“Mirex, despues di risibí denunsia i informashonnan riba ofertanan di trabou dirigí riba siudadanonan dominikano pa biaha pa Rusia i despues e posibel relashon ku aktividatnan ku tin di aber ku e guera entre Rusia i Ukrania, ta konsehá e siudadano pa aktua ku koutela ora haña e tipo di proposishonnan ei”, segun ta bisa den e komunikado.
Seguidamente ta rekomendá pa verifiká for di unda e ofertanan ta bini, e identidat di esun ku ta ofresé trabou i e kondishonnan di trabou, “spesialmente den kaso ku e ofertanan ta bin eksklusivamente via di medionan digital òf intermediarionan di kua e identidat òf akreditashon no por keda komprobá”.
E kansier dominikano, Victori Bisonó, a trata e kaso ku e kansier ruso, Serguei Lavror, durante di un reunion relashoná ku Asamblea General di Nashonnan Uní, segun ta bisa den un komunikado. E dos kansiernan “a yega na un akuerdo pa mantené un kanal di komunikashon”, di akuerdo ku Mirex.
E preokupashon di outoridatnan a surgi despues di informashon kompartí pa e dominikano Juan Carlos Avila Espaillat (28), kende riba Instagram a kompartí informashon bistí den unifòrm militar i hasiendo chansa riba asuntunan relashoná ku Ukrania, e.o. ku kansion dje kantante dominikano Romeo Santos pero adaptá di tal manera ku ta usa palabranan manera “Ukrania, e Rusia nobo”.
Mas aleu Espaillat ta referí na su mes komo “un guerero imparabel”, heridá pa atakenan di drone ukraniano.
Grupo di dominikanonan ku ta biba na Rusia.
