Ayera a tuma lugá e último akto ofisial pa rekordá e grave suseso dje niteclub dominikano, kaminda den kareda di 225 persona a pèrdè nan bida.
HAINA, Rep. Dominicana.- Dominikanonan ayera a kulminá seis dia di luto nashonal dekretá´pa gobièrnu, relashoná ku e drama dje diskotèk Jet Set.
Na Haina, siudat di 200.000 habitante, ayera a rindi homenahe na 25 dje 226 víktimanan ku a pèrdè nan bida ora ku dak dje niteclub a basha bin abou den mardugá di 8 di aprel.
E suseso a tuma lugá na momento ku e merenguero Rubby Perez tabata riba esenario. E tambe ta figurá entre e stimánan ku a pèrdè nan bida.
E organisadónan dje seremonia a bisti un sinta pretu na paña di tur esnan ku a asistí, kasi tur bistí na blanku òf pretu.
“Akto pa rekordá e yunan di nos provinsia”, segun por a lesa riba un pankarta.
Tabatin dos pantaya lèt riba kua a kompartí potrèt i nòmber di esnan ku a pèrdè nan bida. E akto tambe a konta ku presensia di algun di esnan ku a sobrebibí.
E eks-pelotero dominikano di MLB David Ortiz, konosí komo “Big Papi” tabata presente den e seremonia i yorando a referí na esnan ku a pèrdè nan bida den e tragedia.
“Esaki ta un dje momentunan mas trágiko i mas difísil di Rep. Dominicana”,segun Ortiz, kende a biaha for di Boston pa kompañá e famianan. “M’a pasa di entiero pa entiero”, segun el a bisa.
Ayera a kulminá seis dia di duelo nashonal dekretá pa gobièrnu, ku a primintí di lo hasi un investigashon profundo pa saka’fo ta kon bin e desaster a tuma lugá.
