WASHINGTON, MERKA, AFP.- Donald Trump a bisa djárason ku e presidente di Iran a pidi pa un tregua. Pero el a insistí ku e repúblika islámiko mester habri estrecho di Hormuz promé ku esaki sosodé.
Tehran a ninga kompletamente ku presidente Masoud Pezeshkian a pidi pa un tregua ku Washington. Djárason anochi el a anunsiá un serie di atake ku misil i ‘drone’ kontra Israel i basenan merikano den e Golfo.
E deklarashonnan di Trump a keda hasí promé ku un diskurso di e presidente. Ta trata di e promé diskurso desde e atakenan di Merka na Israel riba 28 di febrüari, kual a provoká un guera ku Iran i un krísis di energia mundial.
Merka ta konsiderá un tregua “na momentu ku Estrecho di Hormuz ta kompletamente liber. Si esaki no ta e kaso nos lo sigui bombardiá Iran”, asina Trump a skibi riba su plataforma Truth Social.
E bosero di minister di eksterior, Esmaeil Baqaei, a rechasá Trump su anunsio, yamando esaki “falsu i sin base”.
