WASHINGTON (AFP).- FBI a anunsiá di a start un investigashon pa terorismo despues ku un hòmber armá a perpetrá
loke ku outoridatnan a deskribí komo un atake di tipo di “emboskada” kontra di dos sòldá di Guardia Nashonal serka di White House.
E hóbennan militar tirá den Washington ta den estado kritiko, mientras ayera Merka tabata konmové riba un dia ku normalmente mester tabata unu di trankilidat familiar pa motibu di Thanks Giving.
Outoridatnan a identifiká e atakante komo Rahmanullah Lakanwal, un afgano di 29 aña ku a traha ku forsanan norteamerikano den su pais durante e guera kontra di talibannan i a bai biba na Merka den 2021, ora ku Washington a retirá su tropanan di Afganistan.
Donald Trump a publiká un video den kua el a kalifiká e atake komo un “akto di maldat” i a rematá kontra di inmigrantenan, kendenan el a pinta komo un menasa grandi pa seguridat nashonal di Merka. E presidente a ordená e suspenshon di prosesonan di solisitut di inmigrashon di afganonan.
“Nos mester tuma tur e medidanan nesesario pa sigurá e ekspulshon di kualke strañero di kualke pais ku no ta pertenesé aki òf ku no ta aportá na nos pais. “Si nan no por stima nos pais, nos no ke nan”, segun Trump a bisa.
