Donald Trump durante di su presentashon ayera den hardin di White House, anunsiando medidanan general den sentido di impuesto di importashon riba produktonan estranhero.
WASHINGTON (AFP).- Presidente norteamerikano Donald Trump ayera a lansa un ofensiva komersial generalisá ku impuesto masivo kontra di China i Union Europeo i un mínimo di 10% pa vários pais latinoamerikano.
E republikano ta dera e prinsipio di komersio liber ku Merka a promové durante di dékadanan, pa proklamá un “deklarashon di independensia ekonómiko”. Su meta: Impulsá un “edat di oro” na Merka.
“Durante di dékadanan, nos pais a keda sakiá, violá i devastá pa nashonnan djaserka i otronan leu, aliado i enemigunan”, segun el a bisa den hardin di White House.
E ofensiva ta konsistí di un tarifa di duana mínimo di 10% pa tur importashon i rekargonan selektivo pa sierto pais konsiderá partikularmente hostil den términonan komersial.
E faktura ta fuerte pa China, di kua su produktonan lo risibí impuesto di 34%, i pa Union Europeo, e ta bira 20%. E impuesto lo ta di 24% pa Hapon, 26% pa India i 31% pa Suisa.
Vários pais latinoamerikano a figurá riba e lista di White House: Brasil, Colombia,
Argentina, Chile, Perú, Costa Rica, Repúblika Dominikana, Ecuador, Guatemala, Honduras, El Salvador i Uruguay. Pero lo e apliká e 10% di importashon dje orígennan akí, esta, e tarifa mínimo. E eksepshon ta Nicaragua, ku 18%.
Trump a bisa ku e ta suave en komparashon ku e impuesto ku paisnan ta imponé riba produktonan norteamerikano.
E impuesto universal di 10% por drenta na vigor dia 5 di aprel awor i e sobrá dia 9 di aprel.
Pa Maurice Obstfeld, ekonomista di Instituto Peterson di Ekonomia Internashonal (PIIE) e impuestonan akí ta “un deklarashon di guera na ekonomia mundial” i lo resultá “apsolutamente aplastante” pa algun pais.
E presidente norteamerikano tambe a pone fin na e derechinan di duana pa e paketenan chikitu mandá for di China, loke tabata benefisiá e gigantenan chines di komèrsio elektróniko Shein i Temu.
Ni México ni Canada, e sosionan di Merka den Tratado di Komersio Liber di Nort Amérika (T-MEC), ta figurá riba e lista.
“Na e momento akí, Canada i México ta sigui mará na e emergensia nashonal relashoná ku fentanilo i migrashon i e régimen di impuesto lo keda mantené miéntras ku e kondishonnan ei ta presente”, segun un funshonario di White House a deklará na periodistanan.
Djaweps awor pa 04:01, Washington lo imponé impuesto adishonal di 25% riba outo i piesanan fabriká den ekstranhero.
Teorétikamente lo tin un eksepshon: vehíkulonan ensamblá na México òf Canada lo ta mará na un impuesto di 25% riba solamente parti di piesanan los ku no a keda prosesá na Merka.
