Poko poko pero sigur, e komunidat norteamerikano ta subi kaya ku protesta kontra di entre otro “Inmigration and Customes Enforcement” (ICE) i e propio presidente Donald Trump.
WASHINGTON (AFP).- Na kabes di e promé potensia mundial, ta surgi e pregunta si Donald Trump a alkansá su máksimo ambishonnan? “Awor, e soño ta pa bira un gran presidente”, segun ku resientemente el a konfesá na su nieta Kai, di 18 aña, miéntras nan tabata keiru den un garoshi di gòlf. E kombersashon, publiká pa e hóben riba Instagram, ta ofresé un perspektiva di e motivashonnan dje republikano di 79 aña, un aña despues di su re-elekshon.
Pa Trump, ser un “gran presidente” ta nifiká, mas ku nunka, ehersé un poder ehekutivo na un eskala poko biaha mirá den historia di Merka. Den e último simannan, Trump a intensifiká su maniobranan di poder, vengando di su oponentenan polítiko, tambe manda tropanan pa mas siudat dje pais, sensurando medionan di komunikashon i konsolidando su kontrol den tur departamento di gobièrnu.
Pa krítikonan, esei ta trese dudanan serio riba estado di derecho i abuso di poder di un presidente ku abiertamente ta atmirá monarkanan i gobernantenan outoritario, i kende durante di un bishita resien na Sur Korea a risibí komo regalo un réplika di un korona.
“Sin duda, e tin un parti outoritario”, segun Todd Belt, politikólogo di George Washington Unviersity. Si Trump regresando White House den yanüari último a reforsá su poder, e asesinato dje ultra konservador Charie Kirk den sèptèmber “a reforsá su focus di ‘nos kontr’i nan’”, segun el a splika.
“Enemigunan interno”
E kampaña resien di represaya kontra di su opositornan kisas ta e ehèmpel di mas grandi di abuso di poder di parti di Trump. Departamento di Hustisia a presentá akusashon kontra vários di nan, inkluso su eks-asesor di Seguridat Nashonal John Bolton i e eks-direktor di FBI James Comey, despues ku Trump riba su retnan sosial a eksigí proseso kontra di nan. I miéntras ku e presidente ta dòrna su mes ku akuerdonan di pas den ekstranheria, na Merka di forma habrí e ta ataká “enemigunan interno”, sea ta iskierdistanan òf inmigrantenan. Inkluso el a yega di bisa den un diskurso dilanti di alto mando militar ku siudatnan norteamerikano por bira “vèlt di training” pa e tropanan.
Djabièrnè último, apesar di e parálisis presupuestario di mas di un luna pa un desakuerdo polítiko, Trump, ku ta nenga na dialogá ku demokratnan, a organisá un gala di Halloween den su residensia di Mar-a-Lago, na Florida. E tema tabata “The Great Gatsby”, refiriendo na e personahe fiktisio konosí pa su fiestanan kostoso.
E mei anochi ei, 42 mion norteamerikano a stòp di risibí e yudansa alimentisio di gobièrnu federal. E presidente tambe a purba a silensiá medionan di komunikashon. El a pone lus riba periodistanan ku ta sostené su movementu “Make America Great Again” i a demandá New York Times, Wall Street Journal. Inkluso el a mustra su poder den e propio residensia presidensial: el a basha bou e parti ost di White House pa konstruí un enorme sala di baile, sin konsulta públiko ni aprobashon federal.
Den último dianan, Trump a bolbe konsiderá e posibilidat di un terser mandato den 2028, ounke parse ku e la bèk despues ku e presidente republikano di House of Representatives, Mike Johnson, a bisa ku esei ta kontra di konstitushon.
