Un bista aéreo di e área kaminda e dak a kolèps aña pasá
SANTO DOMINGO, REPÚBLICA DOMINICANA, AFP.- Un korte di República Dominicana a disidí djaluna ku lo persiguí e doñonan di un diskotèk ku a basha den otro aña pasá i laga 236 morto.
E dak di e diskotèk Jet Set ku ta keda na Santo Domingo, a kolèps riba 8 di aprel 2025 mardugá, durante di un konsierto di e kantante di merengue Rubby Perez.
Perez, di 69 aña, tabata entre e víktimanan di e tragedia di mas pió ku a sosodé den e pais karibense den vários dékada. Vários èks hungadó di Big League di beisbòl, i tambe un gobernador provinsial a muri.
E doñonan di e diskotèk, Antonio Espaillat i su ruman muhé Maribel Espaillat, ta akusá ku asesinato inboluntario i leshonnan inboluntario. Polis a arestá ámbos, pero nan a sali liber bou di fiansa.
Un grupo ku ta representá víktimanan i famianan di e tragedia, a pidi pa kambia e akusashon pa “asesinato inboluntario ku intento eventual”, pero hues a rechasá e petishon. E akusashon akí ta un forma di asesinato. E ta nifiká ku e persona no tabata ke pa hende muri, pero tabata na altura di e rísiko serio ku un morto por kai i a aseptá e rísiko tòg.
