WILLEMSTAD – Relashoná ku e konferensia di prensa di 3 di mei 2021 algun doño di skol deportivo a reuní via Zoom pa kolektivamente bati alarma promé ku ta muchu lat. Pa medio di un diálogo ku gobièrnu e grupo aki ke duna un kontribushon na un solushon. Pa e motibu aki e grupo a yega na akuerdo pa manda un karta ofisial pa gobièrnu pa por sinta i deliberá riba e kondishonnan p’asina por habri e skolnan atrobe mas pronto posibel.

Ivan de Windt di 5 triple 9 Fitness a tuma inisiativa i a invitá doñonan di diferente skol deportivo pa online interkambiá di idea tokante e suavisashon di medidanan ku no a konsiderá pa e skolnan deportivo. Esaki ta un desapunto grandi pa e grupo aki ku ta sinti ku ta laga nan na kaya ku e medidanan aktual.  Apesar ku e skolnan deportivo tabata habrí fin di aña pasá tabatin un bahada di kasonan di Corona, segun Johan van Schooten di The Gym at Lions Dive. Meta di e inisiadó Ivan de Windt ta pa forma un plataforma p’asina salbaguardiá interes di tur skol di deporte.

“Habri skolnan deportivo”, ta un gritu unánime di e grupo aki. E grupo ta di opinion ku deporte ta duna un kontribushon na salubridat riba nos isla. Por mira ku obesidat ta un problema grandi bou di e kasonan di morto pa motibu di Corona, pues un estilo di bida hasiendo deporte ta sumamente nesesario. Deporte ta kontribuí na un status mental i físiko saludabel di un individuo, algu ku pa motibu di lockdown tambe a bai konsiderablemente atras.

Ademas di ofresé un kontribushon na un solushon e grupo ta sumamente preokupá ku nan eksistensia riba merkado laboral inkluso e hopi kuponan di trabou ku ta pèrdè pa motibu di esaki. Ta di dos bia ku mester sera Gym pa un temporada largu i for di aña pasá e branch no por a sigui drai riba ful kapasidat. “Nos mester por drai riba ful kapasidat atrobe pa garantisá nos sobrebibensia”, segun Glenn dos Ramos van Multi Action.

E grupo aki ta konvensí alabes ku e skolnan deportivo por habri na un manera responsabel di moda ku Covid-19 no ta haña niun chèns. “Nos ke kontribuí na un solushon den kua seguridat i salubridat ta para sentral”, de Windt ta agregá. Tur doño di skol deportivo ta konfirmá ku ya nan a tuma tur medida nesesario i ku den ningun Gym tabatin un kontagio masal. Pa medio di un karta ofisial e grupo ta urgi gobièrnu kordialmente pa sinta na mesa i konhuntamente yega na un forma kon pa habri e skolnan deportivo mas pronto posibel.

E enkuentro tabata unu riba man i pa e motibu aki de Windt no a haña oportunidat pa invitá tur doño di skol deportivo. Den kaso ku abo tin un skol deportivo òf ta un Personal Trainer i tambe ke keda na altura i òf ke duna un kontribushon, manda un e-mail na [email protected] E grupo ku ta konsistí di e.o. 5 triple 9 Fitness, CrossFit Willemstad, Burnards Gym, CrossFit Damacor, Oxygen Gym, The Gym, I Lift, Multi Action, IMMARTIAL – Athlete Centre por mira bèk na un meeting eksitoso i ta spera ku pronto por sinta na mesa ku gobièrnu.

LAGA UN KOMENTARIO

Please enter your comment!
Please enter your name here