WILLEMSTAD – Un biaha mas ta lanta i tende di aktonan kriminal ku a tuma lugá den kas di hende den oranan di mardugá. E biaha aki a toka turno den barionan di Toni Kunchi i Mahaai. Ta trata aki di dos kaso di atrako brutal i di kual unu ku violensia. Promé polis mester a bai den e bario pariba di Toni Kunchi kaminda e atrakadornan a drenta un kas i atraká un famia hindú. Aki nan a logra bai ku tas di un señora i a maltratá un otro hòmber malamente kousando leshon na su kabes. Esaki djis pa motibu ku e tabatin sèn pero na biyete di India. Ambulans mester a hiba e víktima CMC pa por risibí tratamentu mas avansá na CMC. E otro kaso di atrako brutal a tuma lugá den Mahaaiweg. Polis no por indiká ainda ku e dos kaso nan aki tin relashon ku otro. Na e kas den Mahaai e atrakadornan aki a drenta riba un pareha i a logra bai ku un laptop, un oloshi Rolex i algun kos mas. E pareha tabata opviamente mal spanta. Outoridatnan a pidi atrako team pa bin investigá i tambe a pidi yudansa na ‘slachtofferhulp’ pa bin duna asistensia. Ámbos kaso ta bou di investigashon.
