Kòrsou ta tuma un paso importante pa fortalesé kuido di boka:
WILLEMSTAD. – Ministerio di Salú, Medio Ambiente i Naturalesa (GMN) a tuma un siguiente paso importante pa fortalesé i krea mas aksesibilidat di kuido di boka na Kòrsou. Resientemente, un delegashon a biaha pa Caxias do Sul, Brazil, pa realisá e inspekshon final tékniko i funshonal di dos bùs dental nobo ku a keda fabriká na Marcopolo.
E delegashon tabata bou di guia di Sekretario General di GMN, drs. Sharlon Melfor i tabata inkluí señor Leonard Gomperts, Hefe di Mantenshon na ABC Busbedrijf i señor Brian Simmons, eksperto den ekipo dental. Durante algun dia, e vehíkulonan i nan instalashonnan tékniko i dental a keda inspekshoná detayadamente. Despues di finalisá e inspekshon aki, Sekretario General a duna aprobashon pa embarká tur dos e bùsnan pa Kòrsou.
E kompra di e bùsnan ta forma parti di e desaroyo di e programa preventivo di kuido di boka “Pendiente di bo Djente”. E programa ta enfoká riba un aserkamentu sostenibel i aksesibel di kuido di boka pa, entre otro, mucha i hóbennan, habitantenan di institushon i hende den bario ku ta eksperensiá barera pa haña kuido dental regular.
E enfoke móbil ta kontinuá ku e historia largu di kuido preventivo di boka na Kòrsou i ta kuadra ku e programa di gobernashon di Gabinete Pisas III i ku e strategia di prevenshon di minister Boekhoudt. Gobièrnu di Kòrsou a kuminsá for di aña 1956 ku kuido dental móbil na skolnan. Despues ku e bùs dental anterior a sali for di uso na 2021, a adaptá e servisio i a duna mas informashon tokante limpiesa dental na skolnan i institutonan.
Ku e dos bùs nobonan, kuido di boka por keda hibá atrobe mas serka di e komunidat. E enfoke lo ta riba informashon i edukashon, kontròl preventivo, limpiamentu di djente, tratamentunan dental simpel i kaminda ta nesesario, referensia pa tratamentu mas avansá.
Ta sperá ku e bùsnan lo yega Kòrsou pa final di e di kuater kuartal di 2026. Despues di e preparashonnan nesesario, e meta ta pa pone nan den uso den e promé kuartal di 2027.
Ku e invershon aki, GMN ta sigui invertí den kuido preventivo di boka ku ta aksesibel i den detekshon tempran di problemanan di salú oral.
