Djasabra 29 di ougùstùs 2026 alrededor di 03.39’or, Sentral di Polis a risibí informashon di un aksidente basta grave ku a tuma lugá riba e krusada Dominico “Don” Martina Boulevard i Schottegatweg-Zuid. Na yegada di e promé unidat, el a topa dos vehíkulo, ámbos outo di famia, den kua un di nan tabatin dos dama i den e otro tres okupante. E dos damanan tabata seriamente heridá i nan situashon tabata krítiko. Personal di ambulans ku a yega na e sitio, a indiká ku ningun di dos tabata duna señal di bida. Dòkter di polis ku tambe a presentá despues, a konstatá morto di Sharisemary Rosalia Hous, nasé na Kòrsou 4 di sèptèmber 1985 i Zaira A. Nepomuceno-Martis, nasé na Kòrsou 7 di desèmber 1961. For di investigashon preliminar a sali na kla, ku kousa di e aksidente ta probablemente debí na falta di dunamentu di preferensia. Personal di Departamentu di Tráfiko ta kontinuá ku e investigashon.
WILLEMSTAD – Dos dama a pèrdè nan bida instantáneamente den un aksidente di tráfiko grave ku a tuma lugá alrededor di 4’or di mardugá na e lusnan di tráfiko na Schottegatweg suit/Nieuwehaven den direkshon di Parera.
Segun promé informashon ku EXTRA a risibí, den e aksidente tabata envolví un Hyundai blanku i un Kia Soul. Aparentemente tabata trata di un falta di dunamentu di preferensia entre e dos vehíkulonan, ku a resultá den un impakto sumamente fuerte.
E impakto tabata asina violento ku e Hyundai, den kual e dos dama tabata, a sali for di kaya i a terminá kasi den e pida awa banda di e krusada. Lamentablemente, e dos damanan den e Hyundai no a sobrebibí e aksidente. Nan a pèrdè nan bida na e sitio.
E okupantenan di e Kia Soul tambe a resultá ku heridanan serio. Ambulans a transportá nan ku urgensia pa Curaçao Medical Center pa nan risibí tratamentu médiko.
Polis a sera e área kompletamente pa por hasi investigashon tokante sirkunstansianan ku a kondusí na e aksidente fatal. Despues ku personal kompetente a hasi e trabounan nesesario na e sitio, kurpa di e dos víktimanan a ser transportá pa kas mortuario.
Debí na e lugá kaminda e Hyundai a terminá despues di e impakto, tabata nesesario pa usa un kran pa saka e vehíkulo.
Personal di Departamento di Tráfiko a sigui ku investigashon i a bai Curaçao Medical Center pa papia ku e dos personanan ku a sobrebibí e aksidente.
Te na e momentu aki identidat di e dos damanan ku a fayesé no ta konosí. EXTRA ta sigui pendiente di mas informashon tokante e aksidente lamentabel aki.
