WILLESMTAD – Awe mainta outoridatnan a risibí notifikashon serka un kolega ku tabata na sivil ku e tabata testigu di un kaso di tiroteo riba Rooseveltweg na altura di Alirio. E polis na sivil a mira un par di latino basha bala riba vèn Mitsubishi. Mesora un patruya a yega na e sitio i a listra un outo i a bin haña un arma di kandela i a logra hasi detenshon di dos sospechoso, un dama i un hende hòmber. A hiba na warda di polis pa mas interogashon. TFO a yega na e sitio pa por hasi nan investigashon. A tuma e arma serka nan koleganan i wak e hulsnan na e sitio i e perforashon di bala den e vehíkulo.
Vershon ofisial di polis:
Djaluna 8 di yüni 2026 alrededor di 05.55’or Sentral di Polis a risibí informashon di personanan den besindario di un gym ku tin riba F.D. Rooseveltweg, ku nan tin molèster di muzik duru.
Mesora a dirigí un unidat na e sitio i a resultá ku un ratu promé tabatin tiramentu na e sitio i ku glas di un establesimentu i un vehíkulo den besindario a risibí impakto di bala.
Kontinuando ku e investigashon, polis a hasi kontròl riba un vehíkulo ku tabatin na e sitio.
Den e vehíkulo ku tabata okupá pa un pareha, a bin topa ku un arma di kandela ku a keda konfiská.
Mesora polis a hasi detenshon di e dama V.S.O. di 17 aña di edat nasé na Colombia i e hòmber W.S.J. di 33 aña di edat nasé na Repúblika Dominikana.
A presentá ámbos dilanti di un fiskal ouksiliar ku a ordená nan enkarselamentu pendiente di mas investigashon, miéntras ku a konfiská e vehíkulo.
