Albany Colmenares di e partido polítiko Vente Venezuela dirigí pa Maria Corina Machado despues ku el a rekobrá su libertat na Venezuela.
CARACAS, VENEZUELA, AFP.- Dos figura di oposishon serkano di Maria Corina Machado a keda liberá for di prisòn djadumingu, un luna despues ku outoridatnan a kuminsá laga prezunan polítiko liber despues ku a remplasá e lider Nicolas Maduro.
Juan Pablo Guanipa, di 61 aña, i e eks visepresidente di Asamblea Nashonal a paresé den un video ku el a publiká riba su kuenta di X, huntu ku dokumentonan di e liberashon.
Guanipa a keda arestá den luna di mei na aña 2025, relashoná ku un supuesto konspirashon pa mina e elekshonnan legislativo i regional, kual oposishon a bòikotiá.
Despues ku Merka a kapturá Maduro riba 3 di yanüari, outoridatnan a laga vários prizonero polítiko liber. Gruponan di derecho humano ta kalkulá ku alrededor di 700 persona ta wardando pa rekuperá nan libertat.
E presidente interino Delcy Rodriguez, eks visepresidente di Maduro a yega na poder ku respaldo di presidente merikano Donald Trump. Komo parti di su reformanan, gobièrnu di Rodriguez a dal stapnan pa habri e industria di petroli bèk, i tambe restablesé relashon diplomátiko ku Washington.
Alana Rodriguez, di e partido opositor Boluntat Popular kual ta sostené Maria Corina Machado, reuniendo ku su yu muhé despues ku el a sali for di prisòn na Venezuela.
