SANTIAGO DE CHILE, AP.- Un adolesente di 15 aña i un hòmber di 35 aña ta interná ku herida grave despues ku nan a wòrdu alkansá pa bòmnan lakrimógeno durante un manifestashon pasífiko riba un plasa den sentro di Santiago de Chile. E pais ta pasando dor di kasi dos luna di protesta kontra gobièrnu.
E denunsiánan ta indiká ku polis Carabinero a tira e bòmnan na momentu ku nan tabata vigilando e área pa mantené òrdu durante e manifestashon riba Plaza Italia. E minister di Interior, Gonzalo Blumel, a informá djárason ku e polisnan involukrá den e represhon di e protestanan a haña non-aktif miéntras ta investigá e echonan.
Plaza Italia ta registrá protestanan kasi diario ounke ku un kantidat redusí di manifestante, kompará ku e manifestashonnan multitudinario den òktober i novèmber. Desde e konvulshon sosial di 18 òktober, 26 persona a muri i míles a resultá herida. Mas o ménos 300 tin herida grave na wowo.
E komunidat lokal i internashonal a kuestioná e agentenan chileno pa e abusunan di derechi humano durante e represhon.
