BELGRADO, SERBIA, AP.- Dos hòmber a muri kongelá na Serbia, miéntras un ola di friu a kousa tráfiko largu di outo, blackout i siere di skolnan den algun área.
E kanal di televishon estatal serbio a reportá djaluna ku a haña e kadaver di un hòmber di 48 aña riba un tereno na sneu, den un pueblo na nort di e pais, kende a muri durante oranan di anochi. E kanal a reportá ku a haña un kadaver mas den pueblo di Sid, na nortwèst di e pais, kende tambe ta un víktima ku a muri di friu. E tabatin 61 aña.
Den sentro di Serbia, vários pueblo a keda sin elektrisidat.
Skolnan na Bosnia a sera durante dos dia desde djaluna den siudatnan di Konjic i Jablanica, den sentro di e pais, miéntras a prohibí tráfiko di trùknan i vehíkulonan pisá riba algun karetera kubrí ku sneu.
E minister di Edukashon di Rumania a bisa ku lo sera e skolnan na wèst i sùitwèst di e pais djamars, despues ku sneu fuerte a asotá partinan di e pais i kousa blackout i kongestion riba kaminda.
Algun skol ya tabata sera, spesialmente na wèst di Rumania debí na e blackout, segun indikashon di e ministerio.
