UAGADUGU, BURKINA FASO, AFP.- Dos periodista spañó i un irlandes ku tabata pèrdí den Burkina Faso a keda asesiná pa hòmbernan armá ku a sekuestrá nan djaluna, den un zona kaminda tin aktividat intenso di yagmentu, segun indikashon di fuentenan ofisial.

Promé minister spañó Pedro Sanchez a informá tokante asesinato di e periodistanan spañó riba Twitter.

E ministerio di Eksterior di Islandia a bisa ku “tabatin kontakto ku famia di un siudadano irlandes i ta dunando nan tur sosten konsular posibel”.

Un persona di servisio di seguridat di Burkina Faso a indiká ku e tres personanan a keda asesiná pa teroristanan. E dos spañónan i un irlandes tabata kompañando un patruya kontra yagmentu den e zona na momentu ku nan  a keda ataká djaluna na Fada N’Gourma-Pama, na parti ost di e pais.

Segun testigunan, e tres europeonan kompañá pa un siudadano di Burkina Faso, kende ainda ta pèrdí, a keda sekuestrá i forsanan di seguridat di Burkina Faso ta buskando nan for di djamars.

E atake a laga tres persona mas heridá i tabata obra di hòmbernan armá ku tabata trafiká den dos trùk i desénas di motersaikel, segun fuentenan di seguridat, kual a agregá ku e atakantenan a bai ku vários arma i material, inkluyendo dos trùk i un drone.

LAGA UN KOMENTARIO

Please enter your comment!
Please enter your name here