Willemstad. – Den anochi di djabièrnè pa djasabra mardugá, polis mester a atendé ku dos kaso ku a hala atenshon. Un di nan ta dos hòmber ku a sali kore laga un hende muhé su so den outo i e otro kaso ta dos ruman ku ta hinka otro.
Tabata djabièrnè anochi alrededor di 21.30’or, Sentral di Polis a risibí yamada di un hinkamentu ku tin na un kas na Klein Sta. Martha. Na yegada di unidat di Barber, nan a topa ku dos ruman hòmber, respektivamente E.E.M. di 46 aña di edat i A.C.M. di 42 aña di edat, ámbos nase na Kòrsou. A.M. tabatin sla na su kabes, miéntras E.M. tabatin un hinká na e parti abou di su brasa robes.
For di investigashon a sali na kla ku e dos rumannan aki tabatin un diskushon ku otro, ku a tèrminá den un maltrato di tur dos banda. Ku ambulans a transportá e víktimanan pa poliklínika pa tratamentu médiko, despues di ku ámbos a keda detené pendiente di mas investigashon.
Dos hòmber ta kore bai laga polis
Djasabra mardugá alrededor di 04.20, durante di patruyahe, un unidat di Mantenshon di òrdu a para un vehíkulo den Rontgenstraat pa un kòntròl. Na e momentu ei, dos hòmber ku tabata sinta dilanti den e vehíkulo a sali kore. Un hende muhé di nashonalidat Dominikana ku tabata sintá patras a keda detené, pa motibu ku e no tabatin dokumentunan legal pa permanesé aki na Kòrsou. E vehíkulo a keda konfiská.
