DEN BOSCH.- Fin di luna’kí lo tin un programa grandi di diferente disiplina di kombate manera kickboxing i tambe MMA. E programa akí ta karga e nòmber di Levels Fight League (LFL) 24. Dos atleta YDK lo bai riba 26 di sèptèmber próksimo i lo mira akshon den LFL 24.
Ta trata aki di Endy Semeleer i tambe Barry Irausquin.
Semeleer, èks kampion mundial den kickboxing, lo ta bèk den LFL. Aña pasá durante LFL 23 el a hasi su debut den MMA, i a logra un tremendo aktuashon.
Endy lo batayá e biaha aki kontra Everton Toniazzo den un pelea di MMA. E pelea lo ta den un ‘catchweight’ di 72 kilo.
Miéntras pa loke ta trata Irausquin, e ta un kara konosí kaba den LFL. Barry, na tres okashon kba, a logra e premio di pelea di anochi, den su peleanan den LFL. Banda di esaki e tabatin un nòkout den 17 sekònde, durante su debut na LFL14.
Barry tabatin bon aktuashon tambe aki na Kòrsou, durante Honor Fight League.
Irausquin lo enfrentá Brooklyn Thomas den un pelea di MMA den ‘bantamweight’.
