…E vírùs di Ébola a plama den Repúblika Demokrátiko di Congo na un velosidat spantoso i un di e miedunan mas grandi di outoridatnan ta ku e ta yega na e kapital di Kinshasa…
DR Congo. – E vírùs di Ébola a plama den Repúblika Demokrátiko di Congo na un velosidat spantoso i un di e miedunan mas grandi di outoridatnan ta ku e ta yega na e kapital di Kinshasa.
Tur dia kantidatnan grandi di hende ta bini for di nort i ost di DR Congo riba boto di palu ku e meta pa yega Kinshasa. Timnan di salú ta oumentando kòntròlnan pa protehá e stat yen di kasi 17 mion hende kaminda no a reportá kasonan — te awor.
“Nan ta bini di áreanan di riesgo haltu kaminda e malesa ta presente, pues ora nan yega akí, nos mester hasi kòntròl,” Yves Matwa, un ofisial di kompromiso ku komunidat, a bisa, ku ta bisti un t-shirt ku e lema sobrio “Stòp Ébola.”
Un rei di komersiante i famianan a warda den rei na waf. Tres boto a yega durante anochi for di Kisangani — un stat grandi di riu den nortost kaminda a registrá mas òf ménos 15 kaso di Ébola for di dia ku a deklará e brote 15 di mei último.
Alrededor di 100 dia despues, awor tin mas ku 2.500 morto, ku mitar di nan den e último tres simannan, segun ekspertonan di Nashonnan Uní. Tin mas of ménos 5.000 kaso registrá den seis provinsia pero dòkternan ta bisa ku probablemente tin hopi mas di e strain di Bundibugyo di e vírùs rònt.
– Ébola ‘deskonfiansa’ –
“Mi a tende di Ébola – e ta mata lihé – i mi tin miedu ku por tin hende malu riba mi boto,” e kapitan di un barku ku a yega for di e provinsia sentral di Kasai a bisa despues di un biahe riba riu di un siman largu.
Matwa a bisa ku ta hasi inspekshon di tur boto “profundamente” pa asina ningun kaso sospechoso slep pasa.
Na e tèntnan den serkania, e timnan di screening ta kòntròlá e temperatura di e pasaheronan i ta buska síntomanan di e keintura hemorrágiko. Ta anotá datonan di kontakto di kada biahero i nan puntonan di salida i yegada.
Timnan bistí ku tapaboka i botanan ta subi kada boto ku nan ta konsiderá ta kore riesgo i pa desinfektá esakinan.
“E periodo di inkubashon ta dos pa 21 dia. Un persona por desaroyá síntomanan despues na kas, pero nos lo por sigui nan,” Matwa a bisa.
Míles di hende, ku prinsipalmente no por paga tarifa di avion pa por krusa e pais inmenso di mas ku 100 mion hende, ta usa e riu Congo tur dia loke a hasié un enfoke di e buskamentu di Ébola.
“Si un kaso yega Kinshasa, e lo ta un katástrofe. E kasonan por oumentá despues,” un dòkter a bisa, papiando bou di kondishon di anonimato.
Hopi pasahero ta sorprendí di mira e ekiponan médiko wardando riba waf ora ku nan fèri yega.
“Tin biaha ta difísil pa konvensé nan pa baha i hasi un screening,” Cecile Kisangu, un enfermera, a bisa. “Algun no ta kere ku e malesa ta eksistí i ta kere ku nos a inventá esaki.”
E kampaña di Ébola ta enfrentá deskonfiansa di algun hende den un pais kaminda e estado ta lucha pa hasi su presensia sinti i korupshon ta generalisá.
Segun e Instituto Nashonal di Investigashon Biomédiko di DR Congo (INRB), 30 kaso sospechoso a tèst negativo pa e vírùs di Ébola for di momentu ku a lanta e punto di kòntròl na Bende-Bende na kuminsamentu di ougùstùs.
Pero Nashonnan Uní i otro instansianan ta bisa ku e emergensia ta real. E di 17 brote akí di Ébola ya ta esun mas mortal den historia di DR Congo i ta plama mas lihé ku kualkier otro.
No tin bakuna òf tratamentu spesífiko pa e strain di Bundibugyo i e kordinadó senior di Ébola di Nashonnan Uní Julien Harneis a bisa siman pasá ku e erupshon ta “kresiendo na un ritmo hopi rápido.”
