WILLEMSTAD.- ‘Nos ta den problema serio. Kasonan ta subiendo. Tin nobenta hende interná den hospital ku ta kontagiá ku e vírus di COVID-19. Intensive care, ku tin normal 16 kama, a ampli’é ku 30 kama; 26 ta okupá. Si nos sigui asin’aki nos tin ku ban tuma parti di Sehos pa akapará.’ Asina  dr. Jerry Semper kende ta kordiná henter e proseso di vakunashon na Kòrsou, a bisa ayera durante konferensia di prensa di gobièrnu, relashoná ku ‘Desaroyonan den trayekto di vakunashon na Kòrsou’.

Semper a bisa ku tabata su deseo pa e por tin notisia positivo. Pero esaki no ta e kaso. ‘Nos a splika hopi bia. I mi ta spera ku nos ta komprondé ku e situashon ku nos ta den no ta algu normal. Nos ta den un estado di guera kontra un enemigu invisibel.’ Semper: ‘Nos ta pidiendo 160.000 siudadano pa yuda nos bringa e guera aki. No ta un petishon normal. Nos sa. Nos sa ku ta un situashon difísil. Nos sa ku e materia  ta ageno di hopi hende. No opstante nos ta pidi tur hende pa yuda nos bringa.’

Segun Semper e manera ku hende por yuda ta hopi simpel: laba bo man, tene distansia, i no aglomerá. Esaki ta e reglanan ku nos ta praktiká pa mas ku un aña. ‘I awor nos ta pidi bosnan, por fabor, pa vakuná. Esei ta e armanan ku nos tin kontra e enemigu invisibel ku ta traha 24/7 sin piedat. E sifranan ta klarito. E no ta gaña.’

Semper a bisa ku ‘e materia ta difísil, pero ta nos responsabilidat pa keda splika pueblo ku e kasonan no ta subiendo pasobra hende ta vakunando. No ta bèrdat!’

Dr. Semper a splika ku echo ta ku e vakuna no ta kontené e vírus. ‘E vakuna ta kontené un resèpt genétiko ku ta instruí bo sèlnan pa protehé bo si bo haña vírus.’ Semper a bisa ku nan a haña hopi pregunta tokante esaki. ‘Ta hopi bon pa splika ku ta dos kos ku ta separá. E ta bon pa tur hende komprendé ku e vakuna no ta subiendo e sifranan. Kon nos sa esaki? Simpel. Mayoria di e pashèntnan den CMC no ta vakuná. Gran parti di e pashèntnan ta entre 40 i 60 aña. Nan no a bin na remarke pa vakuná. Esaki riba su mes mester ta evidensia sufisiente ku vakuna no ta subiendo e sifranan.’

LAGA UN KOMENTARIO

Please enter your comment!
Please enter your name here