WILLEMSTAD – Awe den oranan di mardugá un kaso di kandela sumamente lamentabel a tuma lugá den Nijmegenstraat na Steenrijk unda dos persona a bin pèrdè nan bida. Sentral di polis alrededor di 1:35 am a risibí notifikashon ku lo mester tin un kas na kandela. Tantu outoridatnan polisial komo unidatnan di brantwer a akudí rápidamente na e sitio di e kandela. Na yegada a tuma nota ku un kas ya tabata kompletamente na kandela i a ekspandé pa un otro kas den banda. Den e promé kas tabatin dos persona desabilitá ku a keda pega den e kas na kandela i ku no por a logra sali. Dokter di polis a yega na e sitio i a konstatá morto di e dos víktimanan. Outoridatnan lo sigui ku investigashon pa por determiná e kousa di e kandela i kiko a pasa eksaktamente. Departamento tékniko i forensiko lo ta na kabes di e investigashon. Tantu Brantwer di Steenrijk komo Brantwer Mundu Nobo i tambe Rio Canario tabata na e sitio pa pa yuda kombatí i para e kandela aki i evitá ku e por sigui ekspandé i yega na mas kas.
E víktimanan lo ta un mama i un yu ku ta den rolstul pero den transkurso di dia lo haña mas informashon di polis i lo trese esaki pa e siguidónan di Extra. Den Extra Journal 9:30 lo tin video tambe di e kaso lamentabel aki.
