WILLEMSTAD.- Despues di e HIT di aña 2015 “Me Myself and I”, e duo di Axel Pikero i Remy Joss a bolbe pèrkurá pa un hoya di piesa. E biaha aki a toka turno pa un son montuno fushoná i apart manera semper so por. Un areglo super moderno i inovativo sigur pa den e género di kòmbèk.
‘Wòlf den kurpa di karné’ ta toka e tema ku diariamente un i tur ta keda konfrontá den bida. Hendenan ku ta aparentá di ta otro hende ku en realidat nan ta, i ku ta kana intenshonnan ménos bon tras di kabes.
Remy Joss ta hinka bo totalmente den su mundu ku su forma maestral di interpretá e tema aki.Ya kaba e ta zonando ku bon frekuensia na tur radio lokal i mas ku klaro tambe riba retnan sosial.
Dreams semper a pèrkurá pa variashon musikal na nivel i ta demostrá esaki un biaha mas. Sostené i asina keda duna realse na un farándula diversifiká ku semper nos dushi Kòrsou a dispone di dje.
