MARIA CORINA MACHADO
OSLO, Noruega (AFP).- E dudanan riba presensia di e opositor venezolano Maria Corina Machado den e seremonia di entrega premio Nobel di Pas a oumentá ayera despues di kanselashon di un konferensia di prensa. Desena di venezolanonan den eksilio a biaha pa e kapital Noruega pa kompañá e opositor di 58 aña ku for di ougùstùs di 2024 ta biba di forma klandestino i kende nan no a mira den públiko for di yanüari.
E Instituto Nobel a anunsiá wikènt último ku lo por konta ku presensia di Machado pa risibí e premio, ku ta konsistí di un medaya di oro, un diploma i un montante di 1.2 mion dollar. Pero ayera Machado a posponé un konferensia i finalmente a anulá esaki.
Segun bosero di Instituto Nobel, Erik Aasheim, “Maria Corina Machado mes a bisa ku ta difísil pa e yega Noruega. “Pero nos ta spera ku tòg lo e por asistí na entrega dje rekonosimentu”, el a agrega
E eks-hefe di kampaña di Machado a laga komprondé ku sigur Maria Corina Machado a sali for di Venezuela, pero ku lo e regresá. “No ta eksistí ku lo e keda den eksilio. “Ta manera bo ta bisa ku un mama lo stòp di stima su yunan”, segun e bosero di Machado.
Luna pasá e fiskal general di Venezuela a atvertí ku si Maria Corina Machado sali for di e pais, lo konsiderá ku el a “hui”.
Mientras tantu, famianan, aliadonan polítiko i algun presidente latinoamerikano for di ayera ta na Noruega. Ta trata dje opositor Edmundo Gonzalez Urrutia, kandidato pa elekshon presidensial di 2024 na Venezuela i ku awor ta biba na Spaña, komo tambe e presidente argentino Javier Milei.
Otronan ku ta invitá na e seremonia ta mandatarionan di Panamá, José Raúl Mulino; Ecuador, Daniel Noboa, i Paraguay, Santiago Peña. Den Grand Hotel, kaminda esnan premiá pa Nobel sa hospedá, e mama dje galardonada, Corina Parisca, su rumannan i sigur dos di su tres yunan a bisa di no sa unda e ta, pero ku nan ta konfia ku lo e tei.
