CARACAS.- E rekta final pa yega elekshon presidensial na Venezuela ta yená ku duda i esaki ta bira mas grandi despues dje desishon pa retirá invitashon ekstendé na Union Europeo pa opservá e proseso ku, segun ekspertonan, ta manchá ku tur tipo di bentaha na fabor di Nicolas Maduro.
Maduro, ku ta buska e reelekshon, ta enfrentá e diplomátiko i sorprendente kandidato opositor Edmundo Gonzalez Urrutia. Pero faltando dos luna pa elekshon di 28 di yüli, ainda e piesanan ta move manera un wega di dominó.
E elekshon presidensial venezolano ta “un proseso diseñá na fabor dje interes di Maduro pa mantené su mes den gobièrnu”, segun Ignacio Avalos, direktor di “Observatorio Electoral Venezolano” di Nashonnan Uní. “El a duna su mes tur klase di bentaha, kuminsando ku e fecha di elekshon ku ta koinsidí ku fecha natalisio di defuntu eks-presidente Hugo Chavez.
Outoridatnan riba kaminda pa elekshon a pone un banda e kandidatura di Maria Corina Machado, gran faborito den tur enkuesta pa por a gana e elekshon. Pero Korte a prohibié pa desplegá trabounan públiko, ku ta e arma ku Chavez tabata usa kontra di su oponentenan.
Maduro ta omni presente den ret di medionan di komunikashon públiko, inkluso presentá komo “Superman” den propaganda di gobièrnu. Hinter e aparato públiko venezolano ta na su disposishon.
“Akinan e úniko ku ta garantisá pas yama Nicolás Maduro”, segun e propio mandatario di 61 aña ta bisa den un propaganda. Un enkuesta a indiká ku e presidente ta konta ku 30% di popularidat bou di votadónan venezolano.
Consejo Nacional Electoral (CNE), ku ta kai bou di gobièrnu, djamars a anunsiá ku a retirá e invitashon hasí na Union Europeo pa ta presente riba dianan di elekshon, ku tabata parti dje akuerdo entre gobièrnu i oposishon pa e elekshon aki.
Elvis Amoroso, presidente dje organisashon a hustifiká e desishon refiriendo na “aktitut hostil i falta di rèspèt di Union Europeo”, ku a ratifiká sanshonnan kontra di 50 funshonario chavista.
