WILLEMSTAD.- Ayera mainta Parlamento di Kòrsou a bini huntu pa último biaha pa un reunion públiko promé ku e periodo pa sigui ku kampaña previo na elekshon. Na e okashon aki a trata un proposishon di lei presentá pa frakshon di MFK i ku ta enserá eksonerashon di Loonbelasting i primanan sosial pa hóben i adultonan, pero tambe kambio den e ordenansa di Inkomstenbelasting i riba Winstbelasting den kuadro di promoshon di empleo i partisipashon di hóbennan den merkado laboral. Na e okashon aki parlamentario sr. Fergino Brownbill na nòmber di frakshon di MFK a splika den liñanan grandi kiko ta e meta tras di e proyekto di lei en kuestion.
Segun Brownbill, datonan suministrá dor di CBS ta indiká ku desempleo bou di hubentut n’e momentunan aki ta na un nivel di 15%. Banda di esei tin un pueblo ku poko poko pero sigur ta sigui embeyesé, i pa no papia mes di e kosto di bida ku ta haltu. Konsekuentemente komo pais i Parlamento e ta kere ku mester tuma akshon. Parlamento no por sinta wak sino lanta i hasi algu, i fo’i e punto di bista di MFK loke por hasi di forma inmediato ta di bini ku un stimulashon fiskal pa hasi empleo pa hóbennan mas atraktivo. Tin di sigui pusha pa sanger nobo drenta merkado laboral, segun e parlamentario kende tambe ta un hóben.
Komo frakshon di MFK ta evitá ku tin di bai inventá e wil di nobo. Tin un sistema/lei kaba, i si e no ta funshoná manera deseá, mester wak kon por perfekshon’é, trese adaptashon, stimulá pa asina kosnan por drai mas mihó. Loke pais tin te na e momentunan aki ta e Lei di Bion, i loke MFK a hasi ta di hasi adaptashonnan den e lei aki i presentá e kambionan pa asina e por drenta na vigor mas lihé posibel.
Loke ta notando ta ku e tasa di desempleo ta sigui subi i hóbennan den pais ta sigui baha na kantidat. Ora ku hóbennan bai sigui estudio avansá pafó di pais, na momentu ku nan terminá i ke regresá, práktikamente no tin oportunidat aki pa hasi karera. Te na ora ku e apliká pa un trabou mes, e dunadó di trabou ta puntra si e tin eksperensia den e trabou. Esei ta pone ku ta terminá ku su ambishonnan.
Pues ta via di otro medionan tin di stimulá empleo. Segun e kambio di lei, na momentu ku un dunadó di trabou hasi petishon pa un hóben di entre 18-29 aña, e ta bini na remarke pa sierto insentivonan. Esei ta enserá ku e no tin di paga primanan sosial ni Loonbelasting.
